गेवराई बीड : पती आवडत नसल्याने लग्नानंतर २१ दिवसात पती हत्या करण्यात आल्याची घटना बीड जिल्ह्यातील गेवराई येथे घडली असून गेवराई पोलिसांनी पत्नीवर गुन्हा दाखल केला आहे. शीतल पांडुरंग चव्हाण असे अटक केलेल्या आरोपीचे नाव आहे.
पोलिसांनी दिलेल्या माहितीनुसार, एका महिन्यापूर्वी शीतल व पांडुरंग यांचा विवाह संपन्न झाला होता. मात्र शीतल आपला पती पांडुरंग यांच्यापासून खुश नव्हती. यामुळे तिने टोकाचे पाऊल उचलत आपल्याच पतीची गळा दाबून हत्या केली. ७ नोव्हेंबर रोजी मयत पांडुरंग यांना हृदयविकाराचा झटका आला होता. त्यामुळे त्यांना एका खासगी रुग्णालयात दाखल करण्यात आले मात्र डॉक्टरांनी त्यांना मृत घोषित केले. अचानक पांडुरंगच्या जाण्याने त्याच्या नातेवाईकांनी पत्नीच्या विरोधात गुन्हा दाखल करण्यात यावा अशी मागणी गेवराई पोलीस ठाण्यात केली होती.
संशयावरून पोलिसांनी पत्नी शीतलला ताब्यात घेत चौकशीला सुरुवात केली. कसून चौकशी केल्यानंतर शीतलने गुन्हयाची कबुली दिली. आपणच आपल्या पतीची गळा दाबून हत्या केली व हृदयविकाराचा झटका आल्याचा बनाव केला असल्याचे मान्य केले. पोलिसांनी आठच दिवसात हत्येच्या गुन्ह्याचा शोध लावून आरोपीला जेरबंद केले.
