पुणे: सिंहगड रस्त्यावरील एका सोसायटीतील सदनिकेचे कुलूप तोडून तब्बल 8 लाख 65 हजार रुपयांचा ऐवज चोरी झाल्याची घटना उघड झाली होती. या प्रकरणाचा छडा लावताना पोलिसांनी सोसायटीतच काम करणाऱ्या रखवालदारालाच अटक केली.
अटक करण्यात आलेल्या रखवालदाराचे नाव राकेशकुमार मूलचंद सोनी (वय 29, रा. राम अमिलिया, जि. अनुपपूर, मध्य प्रदेश) असे आहे. सोनी हा सिंहगड रस्त्यावरील गणेश मळा परिसरातील एका सोसायटीत रखवालदार म्हणून काम करत होता.
8 ऑगस्ट रोजी तक्रारदार हे बाहेरगावी गेले असता, रखवालदार सोनी याने त्यांच्या सदनिकेचे कुलूप तोडून 10 तोळे सोन्याचे दागिने, किंमत 8 लाख 65 हजार रुपये, असा ऐवज लांबविला होता. 12 ऑगस्ट रोजी तक्रारदार परतल्यावर चोरीचा प्रकार उघडकीस आला. त्यानंतर त्यांनी पर्वती पोलीस ठाण्यात फिर्याद दिली.
फिर्यादीनुसार, चोरट्याने शयनगृहातील कपाट फोडून दागिने चोरले होते. पोलिसांनी तत्काळ घटनास्थळी भेट देऊन तपास सुरू केला. सोसायटीच्या सीसीटीव्ही चित्रीकरणासह घरकाम करणारे, रहिवाशी आणि रखवालदारांची चौकशी करण्यात आली. मिळालेल्या माहितीनुसार रखवालदार सोनी याला संशयित म्हणून ताब्यात घेतले. चौकशीत त्याने चोरीची कबुली दिली. पोलिसांनी त्याच्याकडून 8 लाख 65 हजार रुपयांचे सोन्याचे दागिने जप्त केले.
ही कारवाई परिमंडळ 3 चे पोलीस उपायुक्त संभाजी कदम, सहायक आयुक्त अजय परमार यांच्या मार्गदर्शनाखाली करण्यात आली. यामध्ये वरिष्ठ पोलीस निरीक्षक नंदकुमार गायकवाड, गुन्हे शाखेच्या पोलीस निरीक्षक अनिता हिवरकर, उपनिरीक्षक किरण पवार, तसेच पोलीस कर्मचारी प्रकाश मरगजे, अमोल दबडे, महेश मंडलिक, अमित चिव्हे, सूर्या जाधव, श्रीकांत शिंदे, सद्दाम शेख, मनोज बनसोड, नानासाहेब खाडे आणि राकेश सुर्वे यांनी सहभाग घेतला.
शहरातील अनेक सोसायटींमध्ये रखवालदार काम करतात. परंतु त्यांना कामावर ठेवण्यापूर्वी पोलिस पडताळणी करणे बंधनकारक आहे. त्यांचे नाव, पत्ता आणि चारित्र्य पडताळणी प्रमाणपत्र न घेता रखवालदार नेमू नये, अशा स्पष्ट सूचना पोलिसांकडून देण्यात आल्या आहेत. मात्र अनेक सोसायट्यांमध्ये या सूचनांकडे दुर्लक्ष केले जाते. यामुळेच रखवालदारांकडून घरफोडी किंवा फसवणुकीच्या घटना घडत आहेत. हडपसरमध्ये एका ज्येष्ठ नागरिकाची फसवणूक आणि ओंढ भागातील बंगल्यातील लाखो रुपयांचा ऐवज चोरल्याचे प्रकरण यापूर्वी घडले आहे.
