सोलापूर : जमिनीच्या वादातून सख्या चुलत्याने “तुमचा वंशजच शिल्लक ठेवत नाही”, अशी धमकी देत ४ वर्षीय चिमुकल्या पुतणीचं तोंड आणि नाक दाबून हत्या केल्याची धक्कादायक घटना सोमवारी (ता. २०) सकाळी पाऊणे आठ वाजण्याच्या सुमारास डिकसळ (ता. मोहोळ) येथे घडली आहे.
ज्ञानदा यशोधन धावणे (वय -४ वर्षे, रा. डीकसळ, ता. मोहोळ) असे मयत चिमुकलीचे नाव आहे. यशोदीप शिवाजी धावणे (वय – ३२) असे आरोपी चुलत्याचे नाव आहे. याप्रकरणी यशोधन शिवाजी धावणे यांनी मोहोळ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, यशोधन शिवाजी धावणे हे शेतीवर कुटुंबाचा उदरनिर्वाह चालवतात. त्यांची गावाच्या कडेला एकूण १६ एकर जमीन आहे. त्यापैकी स्वत: यशोधन यांच्या नावावर पाच एकर आणि भाऊ यशोदीप याच्या नावावर पाच एकर व राहिलेली सहा एकर शेतजमीन आईच्या नावावर आहे. भाऊ यशोदीप हा गेल्या तीन वर्षांपासून आईच्या नावावर असलेली सहा एकर जमीन स्वतःच्या नावावर खरेदी करून देण्यासाठी घरातील सर्व लोकांना त्रास देत होता.
गावातील प्रतिष्ठित लोकांनी व नातेवाईकांनी त्याला वेळोवेळी बैठक बसवून “तुमचे आई वडील असेपर्यंत त्यांच्या नावावर राहू दे. नंतर ते सहा एकर तुम्हा दोघं भावांच्याच नावावर होणार आहे आणि आम्ही करून देऊ”, असे गावातील प्रतिष्ठित लोकांनी वेळोवेळी सांगून देखील यशोदीपच्या मनात राग होता.
सोमवारी सकाळी साडेसात वाजण्याच्या सुमारास यथोधन, पत्नी योगीता आणि आई हे शेतातील कामे करण्यासाठी शेतात गेले. त्यावेळी यशोधन यांची मुलगी घरात झोपलेली होती. शेतातील काम करून सकाळी सव्वा आठ वाजण्याच्या सुमारास यशोधन घरी आले असता त्यांना त्यांची मुलगी घरात दिसली नाही. तेव्हा यशोधन यांनी सर्वांना फोन करुन चौकशी केली असता ती कुठेही दिसून आली नाही.
यशोधन यांनी भाऊ यशोदीप याला फोन लावून “मुलगी घरात नाही. कुठे आहेस तू मुलीला पाहिलस का?, असं विचारले असता त्याने “मी तुझ्या मुलीला ठार मारून मलिकपेठ येथील सिना नदीपात्रात पाण्यात टाकून दिले”, असे सांगितले. घाबरलेल्या बापाने दुचाकीवरुन मलिकपेठ गाठत सिना नदीचे पुलावरून नदीत पाहिले असता मुलगी पाण्यावर तरंगत दिसली.
तिचा मृतदेह मोहोळ येथील ग्रामीण रुग्णालयात आणला असता तपासुन डॉक्टरांनी तिला मृत घोषीत केले. मोहोळ पोलिसांनी सोमवारी रात्री उशिरा गुन्हा नोंदवून यशोदीपला ताब्यात घेतले आहे.
