पुणे : पुण्यात गुन्हेगारीच्या घटनांमध्ये सातत्याने वाढ होताना दिसत आहे. त्यात आता एका तरुणाच्या डोक्यात सिमेंटचा पोल मारून हत्या करण्यात आल्याची घटना हवेली तालुक्याच्या बकोरी गावातील वारघडे वस्ती येथे घडली. तसेच यामध्ये दोनजण गंभीर जखमी देखील झाले आहेत.
सुहास हरिदास शिंदे (रा. वरघडे वस्ती, बकोरी गाव, ता. हवेली) असे मृत व्यक्तीचे नाव असून, संदिप हरिदास शिंदे आणि हरिदास केरबा शिंदे हे जखमी झाले आहेत. याबाबत संदिप शिंदे याने लोणीकंद पोलीस ठाण्यात फिर्याद दिली आहे. त्यानुसार पोलिसांनी किसन पवार, बालाजी पवार, दिगंबर पवार (सर्व रा. बकोरी गाव, ता. हवेली) यांच्यावर विविध कलमांन्वये गुन्हा दाखल केला आहे.
पत्नीला मेसेज करण्यावरून झाला वाद
आरोपी किसन पवार हा फिर्यादीच्या पत्नीला मोबाईलवर मेसेज करुन त्रास देत असल्याने वाद झाला होता. हा वाद मिटवण्यासाठी जखमी व आरोपी सोमवारी रात्री फिर्यादी यांच्या घरासमोर बसले होते. त्यावेळी त्यांच्यात पुन्हा वाद झाला. याचदरम्यान आरोपींनी सुहास शिंदे याच्या डोक्यात सिमेंटचा पोल मारला. यामध्ये गंभीर जखमी झालेल्या सुहासला रुग्णालयात दाखल करण्यात आले होते. मात्र, उपचारादरम्यान त्याचा मृत्यू झाला.
