Pune Solapur Highway उरुळी कांचन, ता. १८ : पुणे-सोलापूर महामार्गावर पुन्हा एकदा भरधाव वाहनाचा कहर पाहायला मिळाला आहे. भांडगाव परिसरात भरधाव वेगाने आलेल्या अज्ञात वाहनाने दुचाकीला पाठीमागून जोरदार धडक देत भीषण अपघात घडवला. या अपघातात पती-पत्नी आणि त्यांचा ९ वर्षीय मुलगा गंभीर जखमी झाले असून, अपघातानंतर वाहनचालक घटनास्थळावरून पसार झाल्याने संताप व्यक्त केला जात आहे. Pune Solapur Highway
मिळालेल्या माहितीनुसार, सोनाली अनिल शेलार (वय २६), त्यांचे पती अनिल लक्ष्मण शेलार आणि मुलगा श्रेयश (वय ९) हे शनिवारी पहाटे उरुळी कांचन येथून जामखेडकडे निघाले होते. हिरो होंडा फॅशन (MH12/FE/4755) या दुचाकीवरून प्रवास सुरू असताना सकाळी सुमारे ७.१५ वाजता भांडगाव येथील टेस्ट बाईट कंपनीसमोर मागून भरधाव वेगाने आलेल्या अज्ञात वाहनाने त्यांच्या दुचाकीला जोरदार धडक दिली. Pune Solapur Highway
धडक इतकी जबरदस्त होती की, दुचाकीवरील तिघेही रस्त्यावर फेकले गेले. अपघातात सोनाली शेलार यांच्या डोक्याला, तोंडाला आणि पायाला दुखापत झाली असून, अनिल शेलार यांच्या डोक्याला तसेच हात-पायांना गंभीर मार लागला आहे. तर ९ वर्षीय श्रेयशच्या हातापायांनाही गंभीर दुखापत झाली आहे. अपघातानंतर काही क्षण परिसरात एकच गोंधळ उडाला होता. Pune Solapur Highway
घटनास्थळी जमलेल्या नागरिकांनी तत्काळ मदतीसाठी धाव घेत रुग्णवाहिका बोलावली. जखमींना तातडीने यवत येथील आनंद हॉस्पिटलमध्ये उपचारासाठी दाखल करण्यात आले. मात्र धडक देणारा वाहनचालक वाहन न थांबवता पसार झाला. या घटनेमुळे महामार्गावरील बेफाम वाहनचालकांचा प्रश्न पुन्हा ऐरणीवर आला आहे. “धडक द्या आणि पळा” अशा प्रकारांमुळे निष्पाप नागरिकांचे जीव धोक्यात येत असल्याची भावना स्थानिकांकडून व्यक्त केली जात आहे.
दरम्यान, सोनाली शेलार यांच्या फिर्यादीवरून यवत पोलीस ठाण्यात अज्ञात वाहन चालकाविरोधात भारतीय न्याय संहिता कलम २८१, १२५(अ), १२५(ब) तसेच मोटार वाहन कायद्यानुसार गुन्हा दाखल करण्यात आला आहे. पुढील तपास पोलीस हवालदार भापकर करत आहेत.
