Pune News : पुणे : वार्षिक लसीकरणासाठी क्लिनिकमध्ये आणलेल्या हनी नावाच्या एका श्वानाला इंजेक्शन देण्यासाठी त्याच्या गळ्याभोवती पट्टा बांधला. हा पट्टा घट्ट झाल्याने त्याचा दूर्दैवी मृत्यू झाल्याची घटना पाषाण येथील विगल्स माय पेट क्लिनिकमध्ये १७ नोव्हेंबर रोजी सायंकाळी घडली. या प्रकरणी पोलिसांनी दोन डॉक्टरांसह चौघांवर गुन्हा दाखल केला आहे.
याबाबत मिळालेल्या अधिक माहितीनुसार, बाणेर पाषाण लिंक रोडवरील एका ३५ वर्षांच्या महिलेने याप्रकरणी चतुःशृंगी पोलीस ठाण्यात तक्रार दिली आहे. त्यानुसार पोलिसांनी डॉ. संजीव राजाध्यक्ष (वय ६०), डॉ. शुभम राजपुत (वय ३५) आणि त्यांच्या दोन सहायकांवर गुन्हा दाखल केला आहे.
पोलिसांनी दिलेल्या माहितीनुसार, फिर्यादी महिलेकडे ‘हनी’ नावाचा लॅब्रोडर जातीचा श्वान होता. वार्षिक लसीकरण आणि नेल ट्रिमिंगसाटी ही महिला श्वानाला घेऊन पाषाण परिसरातील विगल्स माय पेट क्लिनिकमध्ये १७ नोव्हेंबर रोजी आली होती. दरम्यान, तिने हनीला डॉक्टरांच्या ताब्यात दिले. डॉ. राजपूत आणि त्यांचे दोन सहकारी त्यांच्याकडील पट्टयाने हनीला झाडाला बांधण्यासाठी प्रयत्न करत होते. त्या वेळी श्वानाला बांधण्यासाठी वापरण्यात येणाऱ्या पट्ट्याचा गळफास बसला. गळफास घट्ट झाल्याने श्वान जागीच कोसळला. डॉक्टरांनी श्वानावर तत्काळ उपचार सुरू केले. मात्र, त्याचा उपयोग झाला नाही.
दरम्यान, या घटनेनंतर १५ मिनिटांनी डॉक्टरांनी फिर्यादी महिलेला हनीचा मृत्यू झाल्याचे सांगितले. त्यानंतर दोन्ही डॉक्टर श्वानाच्या मृत्यूबाबत काहीही न बोलता तेथून निघून गेले. संबंधित महिलेसह कुटुंबाला या श्वानाचा लळा लागला होता. श्वान ४० दिवसांचा असल्यापासून तो १२ वर्षांचा होईपर्यंत त्यांच्या कुटुंबात मोठा झाला होता. श्वानाच्या मृत्युमुळे दुखावलेल्या महिलेने चतुःश्रृंगी पोलिसांत धाव घेतली. श्वानाचा मृत्यू डॉक्टरांच्या निष्काळजीपणामुळे झाल्याचे फिर्यादीत नमूद केले आहे.
या प्रकरणात पोलिसांनी डॉक्टरांविरूद्ध गुन्हा दाखल केला. चतु:शृंगी पोलीस या घटनेचा अधिक तपास करत आहेत.
