Pune : विद्येचे माहेरघर मानल्या जाणाऱ्या सावित्रीबाई फुले पुणे विद्यापीठात सुरक्षा व्यवस्थेवर गंभीर प्रश्नचिन्ह निर्माण करणारी घटना समोर आली आहे. शुक्रवारी रात्री एका परदेशी विद्यार्थिनीच्या निवासस्थानी घुसून डिलिव्हरी बॉयने अश्लील वर्तन केल्याचा आरोप झाला असून, त्याहून धक्कादायक म्हणजे ही घटना दडपण्याचा प्रयत्न झाल्याचे आरोपही पुढे आले आहेत.
मिळालेल्या माहितीनुसार, रात्री उशिरा ऑर्डर देण्याच्या बहाण्याने आलेल्या डिलिव्हरी बॉयने विद्यार्थिनींच्या खोलीसमोर अनुचित हालचाली केल्या. अचानक घडलेल्या या प्रकारामुळे घाबरलेल्या विद्यार्थिनींनी तक्रार करण्याचा प्रयत्न केला. मात्र, त्यांना त्वरित पोलिसांकडे नेण्याऐवजी काही संबंधितांनी “तक्रार देऊ नका” असा दबाव टाकल्याचा आरोप आहे. विद्यार्थिनींकडून जबरदस्तीने लेखी निवेदन घेतल्याचेही समोर आले असून, हा मुद्दा विद्यापीठाच्या अधिसभेत गाजला.
या घटनेने विद्यापीठातील सुरक्षा यंत्रणेतील त्रुटी उघड केल्या आहेत. आंतरराष्ट्रीय विद्यार्थ्यांसाठी स्वतंत्र वसतिगृहाची व्यवस्था असतानाही काही विद्यार्थिनींना प्राध्यापकांच्या निवास इमारतीत ठेवण्यात आले होते. या इमारतीत CCTV कॅमेरे नसणे, सुरक्षा रक्षकांची कमतरता अशा बाबी गंभीर ठरत आहेत. विशेषतः परदेशी विद्यार्थ्यांच्या सुरक्षेचा प्रश्न अधिक संवेदनशील असताना अशा प्रकारची निष्काळजीपणा चिंताजनक आहे.
या पार्श्वभूमीवर कुलगुरू डॉ. सुरेश गोसावी यांनी 2 दिवसांत सखोल चौकशी करून दोषींवर कठोर कारवाई करण्याचे आश्वासन दिले आहे. तसेच अधिकृत पोलिस तक्रार दाखल करण्याची प्रक्रियाही सुरू करण्यात आली आहे.
ही घटना केवळ एका विद्यार्थिनीपुरती मर्यादित नाही, तर संपूर्ण शैक्षणिक व्यवस्थेतील सुरक्षेच्या निकषांवर प्रश्न उपस्थित करते. विद्यार्थ्यांचा विश्वास टिकवण्यासाठी आणि विशेषतः महिला व परदेशी विद्यार्थ्यांच्या सुरक्षिततेसाठी ठोस आणि तातडीचे पाऊल उचलणे आता अत्यावश्यक ठरले आहे.
