Bhor News पुणे, ता.2 : नसरापूर (ता. भोर) येथे मानवतेला काळीमा फासणारी अतिशय संतापजनक घटना उघडकीस आली आहे. दोन वर्षांच्या निष्पाप चिमुकलीवर अत्याचार करून तिची निर्घृण हत्या करण्यात आल्याने संपूर्ण गाव सुन्न झाले असून जिल्ह्यात संतापाची लाट उसळली आहे. Bhor News
उन्हाळ्याच्या सुट्ट्यांमुळे ही चिमुकली आपल्या आजीकडे आली होती. घरासमोर खेळत असताना ती अचानक बेपत्ता झाली. सुरुवातीला कुटुंबीयांनी आसपास शोध घेतला; मात्र वेळ जसजसा पुढे सरकत गेला तसतशी चिंता वाढू लागली. काही क्षणांतच “मुलगी हरवली” ही बातमी गावभर पसरली आणि ग्रामस्थ मोठ्या संख्येने शोधमोहीमेत सहभागी झाले. शोध घेत असताना गावातील एका गोठ्याजवळ संशयास्पद परिस्थिती आढळली. तेथे पाहणी केली असता चिमुकलीचा मृतदेह आढळून आला. हा प्रकार समोर येताच गावात शोककळा पसरली आणि वातावरण तणावपूर्ण बनले. Bhor News
पोलिसांनी तात्काळ तपास सुरू करून परिसरातील सीसीटीव्ही फुटेजची तपासणी केली. त्यामध्ये एक वृद्ध व्यक्ती चिमुकलीला घेऊन जात असल्याचे दिसून आले. पुढील तपासात संबंधित आरोपीने चिमुकलीला फूस लावून गोठ्यात नेल्याचे, तिच्यावर अत्याचार करून हत्या केल्याचे समोर आले असल्याची माहिती सूत्रांनी दिली. Bhor News
या घटनेची माहिती समोर येताच संतप्त ग्रामस्थ मोठ्या संख्येने घटनास्थळी जमले. आरोपीला कठोर शिक्षा देण्याची मागणी करत काही काळ वातावरण तापले होते. पोलिसांनी घटनास्थळी पोहोचून परिस्थिती नियंत्रणात आणली. या अमानुष घटनेमुळे संपूर्ण परिसर हादरला असून आरोपीला कठोरात कठोर शिक्षा व्हावी, अशी एकमुखी मागणी होत आहे.
