Pune Crime : राज्यात दररोज कुठे ना कुठे गुन्हेगारीच्या घटना घडताना दिसतात, आणि पुणेही त्याला अपवाद नाही. तळेगावमध्ये तर पाणी घेण्यावरून एका तरुणाला दगडाने मारहाण केल्याची धक्कादायक घटना समोर आली आहे. Pune Crime बुधवारी रात्री साडेनऊच्या सुमारास वारंगवाडीमध्ये हा प्रकार घडला.
काय घडलं?
वारंगवाडीतील नायरा पीजी हॉस्टेलसमोर तिघांनी मिळून एका तरुणावर दगडाने आणि लाथाबुक्क्यांनी जोरदार हल्ला केला. या मारहाणीमध्ये तो तरुण गंभीर जखमी झाला. या प्रकरणी मयूर लष्करे, शुभम शेडगे आणि त्यांचा एक साथीदार (वय अंदाजे २५) यांच्यावर गुन्हा दाखल करण्यात आला आहे, अशी माहिती तळेगाव MIDC पोलिसांनी दिली.
जखमी तरुणाचं नाव सौरभ अनिलकुंभार सिंग (वय २४) असून तो नायरा पीजी हॉस्टेलमध्ये राहतो. त्याने गुरुवारी पोलीस स्टेशनमध्ये तक्रार दाखल केली.
सौरभने दिलेल्या माहितीनुसार, तो रात्री पाणी घेऊन परत येत असताना मयूर लष्करेने काहीही कारण नसताना त्याच्यावर दगडाने हल्ला केला. त्यानंतर शुभम शेडगे आणि त्यांच्या साथीदाराने त्याच्या डोक्यात दगडाने वार करत हाताने, लाथाबुक्क्यांनी मारहाण केली.
या मारहाणीमुळे परिसरात एकच खळबळ उडाली असून पोलीस पुढील तपास करत आहेत.
