पुणे: पुणे शहर गुन्हे शाखेच्या अनैतिक मानवी वाहतूक व व्यापार प्रतिबंध कक्षाने (Anti Human Trafficking Unit) वाघोली परिसरातील एका लॉजवर टाकलेल्या धाडीत वेश्याव्यवसाय चालविणाऱ्या रॅकेटचा पर्दाफाश केला. या कारवाईत दोन एजंटांना अटक करण्यात आली असून तीन महिलांची सुटका करण्यात आली आहे. पोलीस निरीक्षक आशालता खापरे यांच्या मार्गदर्शनाखाली ही कारवाई करण्यात आली.
आफताब इद्रीस अहमद (वय २१, रा. खराडी) आणि गणेश सुनिल हांडगर (वय २३, रा. बावडी, ता. हवेली) असे अटक करण्यात आलेल्या आरोपींची नावे आहेत. याप्रकरणी गुन्हे शाखेचे पोलीस हवालदार तुषार नामदेव भिवरकर यांनी वाघोली पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, अनैतिक मानवी वाहतूक व व्यापार प्रतिबंध कक्षाचे पथक ३० जून रोजी शहरात छुप्या पद्धतीने सुरू असलेल्या वेश्याव्यवसायाविरोधात विशेष मोहिम राबवत होते. त्यावेळी गुप्त बातमीदारामार्फत आफताब अहमद आणि गणेश सुनिल हांडगर हे ग्राहकांना मुली पुरवून वाघोली-उबाळेनगर परिसरात वेश्याव्यवसाय चालवत असल्याची खात्रीशीर माहिती मिळाली.
माहितीची पडताळणी करण्यासाठी पोलिसांनी बनावट ग्राहकाची नियुक्ती केली. एजंट आफताब याच्याशी मोबाईलवर संपर्क साधल्यानंतर त्याने उबाळेनगर येथील आथिती लॉज येथे येण्यास सांगितले. शॉर्ट सर्व्हिससाठी १,५०० रुपये निश्चित करण्यात आले. पोलिसांनी पंचांसमक्ष त्या नोटांचे क्रमांक नोंदवून बनावट ग्राहकाकडे सुपूर्द केले.
पूर्वनियोजित योजनेनुसार बनावट ग्राहक लॉजमध्ये पोहोचला. तेथे तीन महिलांना दाखवून त्यापैकी एकीची निवड केल्यानंतर एजंट आफताबने १,५०० रुपये स्वीकारले. ठरल्याप्रमाणे बनावट ग्राहकाने पोलिसांना व्हॉट्सॲपद्वारे लोकेशन पाठवताच गुन्हे शाखेच्या पथकाने लॉजवर छापा टाकला.
View this post on Instagram
छाप्यात तीन महिला आणि दोन एजंट ताब्यात घेण्यात आले. चौकशीदरम्यान संबंधित महिलांनी, आरोपी आफताब अहमद व गणेश हांडगर यांनी भरपूर पैसे मिळण्याचे आमिष दाखवून त्यांच्याकडून वेश्याव्यवसाय करून घेत असल्याची कबुली दिली. ग्राहकांकडून १,५०० रुपये घेऊन त्यापैकी प्रत्येकी १,००० रुपये महिलांना दिले जात असल्याचे, तर उर्वरित रक्कम एजंट स्वतः ठेवत असल्याची माहितीही समोर आली.
कारवाईदरम्यान बनावट ग्राहकाकडून स्वीकारलेले १,५०० रुपये आरोपी आफताब अहमद याच्याकडून जप्त करण्यात आले. पंचांसमक्ष नोटांचे क्रमांक तपासल्यानंतर तीच रक्कम असल्याची खात्री करण्यात आली. या कारवाईत तीन महिलांची सुटका करून त्यांना सुरक्षित ताब्यात घेण्यात आले असून, आरोपी आफताब इद्रीस अहमद आणि गणेश सुनिल हांडगर यांच्याविरुद्ध अनैतिक मानवी वाहतूक व व्यापार प्रतिबंधक कायद्यानुसार गुन्हा दाखल करण्यात आला आहे. पुढील तपास गुन्हे शाखेकडून सुरू आहे.
