पुणे : पुण्यातील प्रसिद्ध बिल्डर विशाल अग्रवाल यांचा मुलगा केतन अग्रवाल हत्या प्रकरणात आता एक नवी आणि महत्त्वाची अपडेट समोर आली आहे. केतनच्या मोबाईल फोनद्वारे नवनवीन धागेदोरे तपासले जात आहेत.त्याच्या मृत्यूपूर्वी सिया हिच्याकडे केतनचा मोबाईल कसा आला आणि त्या मोबाईलमधील काही महत्त्वाचा डेटा डिलीट करण्यात आला का, याचा शोध घेण्यासाठी पोलिसांनी तपासाची गती वाढवली आहे.
मिळालेल्या प्राथमिक माहितीनुसार, लोहगड परिसरात घडलेल्या घटनेदरम्यान केतन खाली पडण्यापूर्वी त्याचा मोबाईल त्याच्याकडे नसून सियाकडे असल्याचा संशय व्यक्त केला जात आहे. त्यामुळे नेमक्या कोणत्या परिस्थितीत मोबाईल सियाकडे गेला, हा तपासाचा केंद्रबिंदू बनला आहे.
केतनच्या कुटुंबीयांनी घटनास्थळी पोहोचल्यानंतर सियाने केतनचा मोबाईल त्यांच्याकडे सुपूर्द केला होता. मात्र, कुटुंबीय लोहगडावर पोहोचण्यापूर्वी काही काळ मोबाईल सियाकडेच होता. याच कालावधीत मोबाईलमधील काही महत्त्वाचे पुरावे किंवा डेटा डिलीट करण्यात आला असण्याची शक्यता आहे.
पोलिसांनी केतनचा मोबाईल जप्त करून तो फॉरेन्सिक तपासणीसाठी पाठवला आहे. दरम्यान, केतनच्या मृत्यूबाबत आधीपासूनच विविध प्रश्न उपस्थित होत आहेत. अशात मोबाईलशी संबंधित हा नवा तपासाचा धागा प्रकरणाला वेगळे वळण देण्याची शक्यता वर्तवली जात आहे.
