पुणे : केंद्रीय महसूल गुप्तचर यंत्रणेने ‘ऑपरेशन गोल्डन डॉन’ हे विशेष अभियान राबवून (डीआरआय) देशातील सर्वात मोठे सोन्याच्या तस्करीचे रॅकेटचा पर्दाफाश केला आहे. डीआरआयने पुणे, मुंबई, पाटणा येथून १०१ किलो सोने, ७४ लाख परकीय व ६३ लाखाच्या भारतीय चलनाच्या नोटा जप्त केल्या असून ७ सुदानी व ३ भारतीय नागरिकांना अटक केली आहे. या सर्व सोन्याची किंमत अंदाजे ५१ कोटी रुपये आहे.
डीआरआयमधील सूत्रांनी दिलेल्या माहितीनुसार, भारत-नेपाळ सीमेवरून मोठ्या प्रमाणावर सोन्याची तस्करी होत आहे. हे सोने प्रामुख्याने मुंबई व पुणे येथे असल्याचीही डीआरआयच्या अधिकाऱ्यांना माहिती मिळाली होती. मिळालेल्या माहितीच्या अनुषंगाने आरोपींना पकडण्यासाठी पोलिसांनी दोन दिवस सापळा रचला.
पहिल्या कारवाई केंद्रीय महसूल गुप्तचर यंत्रणेने पहिली पाटणा येथे केली. दोन सुदानी नागरिक व त्यांना साहाय्य करणारा भारतीय नागरिक मुंबईला येणाऱ्या रेल्वेमध्ये बसले होते. गुप्तचर यंत्रणेनेला सुदानी नागरिकांच्या जॅकेटमध्ये ४० पाकिटांतून ३७ किलो सोन्याची पेस्ट लपविली असल्याचे आढळून आणि त्यानंतर तिघांनाही ताब्यात घेण्यात आले..
दुसऱ्या कारवाई केंद्रीय महसूल गुप्तचर यंत्रणेने पुण्यात केली. हैदराबाद येथून पुणे मार्गे मुंबईत येणाऱ्या एका बसमध्ये २ सुदानी नागरिकांनी आपल्या हँडबॅगमध्ये साडेपाच किलो सोन्याची पेस्ट लपवली होती. त्यांना पुणे येथे अटक करण्यात आली.
तर तिसऱ्या कारवाई केंद्रीय महसूल गुप्तचर यंत्रणेने मुंबईत केली आहे. दोन सुदानी नागरिक पाटणा येथून मुंबईत पोहोचले होते. त्यांना मुंबईत अटक करण्यात आली. तसेच मुंबई शहरात आलेले आणखी २० किलो सोने डीआरआयच्या अधिकाऱ्यांनी जप्त केले आहे.
