पुणे : पॉलिसीच्या रकमेचे आमिष दाखवून एका नागरिकाची ऑनलाइन आर्थिक फसवणूक करण्यात आली. या प्रकरणात बाणेर पोलिसांच्या सायबर तपास पथकाने तत्परतेने कारवाई करत फसवणूक झालेल्या रकमेपैकी 3 लाख 3 हजार 540 रुपये 11 पैसे कायदेशीर प्रक्रियेद्वारे फिर्यादीला परत मिळवून दिले. MRM (मनी रिस्टोरेशन मॉड्यूल) पोर्टलच्या माध्यमातून ही कारवाई करण्यात आली.

पॉलिसीच्या रकमेचे आमिष दाखवून फिर्यादीची दिशाभूल करण्यात आली. त्यानंतर त्यांच्या बँक खात्यातून विविध खात्यांवर पैसे वर्ग करून आर्थिक फसवणूक करण्यात आली. या प्रकरणात एकूण 6 लाख 70 हजार 298 रुपयांची फसवणूक झाल्याची माहिती पोलिसांनी दिली आहे. याप्रकरणी तक्रार प्राप्त होताच बाणेर पोलिसांच्या सायबर पथकाने महत्त्वाच्या ‘गोल्डन अवर’मध्ये तातडीने तांत्रिक तपास सुरू केला. संबंधित बँका आणि वित्तीय संस्थांशी दूरध्वनी तसेच पत्रव्यवहाराद्वारे सातत्याने संपर्क साधत पैशांचा माग काढण्याचे प्रयत्न करण्यात आले.
केंद्र सरकारच्या मनी रिस्टोरेशन मॉड्यूल पोर्टलवर MR260919126720 रिक़्वेस्ट अंतर्गत कार्यवाही करण्यात आली. त्यानंतर संबंधित बँक खात्यांतील रक्कम रोखून धरण्यात आली. या प्रक्रियेत विविध बँक खात्यांमध्ये रोखून ठेवलेल्या रकमेपैकी 3 लाख 3 हजार 540 रुपये 11 पैसे फिर्यादीला कायदेशीर प्रक्रियेद्वारे परत मिळवून देण्यात आले.सायबर फसवणूक झाल्यास नागरिकांनी वेळ न दवडता तातडीने तक्रार नोंदवावी. सुरुवातीच्या काळात तक्रार केल्यास फसवणुकीची रक्कम रोखून ठेवण्याची आणि परत मिळवण्याची शक्यता वाढू शकते.

ही कारवाई अपर पोलीस आयुक्त मनोज पाटील, पोलीस उपायुक्त चिलूमुला रजनीकांत आणि सहायक पोलीस आयुक्त ब्रह्मदेव गावडे यांच्या मार्गदर्शनाखाली करण्यात आली. बाणेर पोलीस ठाण्याचे वरिष्ठ पोलीस निरीक्षक चंद्रशेखर सावंत, पोलीस निरीक्षक (गुन्हे) विजय खिल्लारे, सहायक पोलीस निरीक्षक नंदकुमार कदम, सहायक पोलीस फौजदार शिंदे, पोलीस अंमलदार दत्ता काळे, महिला पोलीस अंमलदार योगिता मिसाळ तसेच सायबर तपास पथकातील अधिकारी व अंमलदारांनी या कारवाईत सहभाग घेतला.







