विशाल शिंदे
Nasarapur News भोर, ता. 4 : भोर तालुक्यातील नसरापूर येथे अल्पवयीन चिमुरडीवर लैंगिक अत्याचार करून निर्घृण हत्या झाल्याच्या घटनेने राज्यभरात संतापाची लाट उसळली असताना, या प्रकरणातील आरोपीच्या कुटुंबीयांनी प्रथमच माध्यमांसमोर येत आपली भूमिका स्पष्ट केली आहे. कुटुंबीयांनी आरोपीच्या कृत्याचा तीव्र निषेध करत त्याला कठोरात कठोर शिक्षा देण्याची मागणी केली. Nasarapur News
संवादादरम्यान आरोपीची पत्नी भावनिक होत म्हणाली, “ज्या ठिकाणी त्या चिमुरडीवर अत्याचार झाला, त्याच ठिकाणी त्याला शिक्षा झाली पाहिजे.” या घटनेनंतर आपण अन्न-पाणी घेतले नसल्याचे सांगत, पीडित कुटुंबाच्या वेदनेची कल्पना केली तरी अंग शहारते, असेही त्यांनी नमूद केले. Nasarapur News
त्यांनी पुढे सांगितले की, गेल्या दहा वर्षांपासून आरोपीचा कुटुंबाशी कोणताही संबंध नव्हता. “तो घरापासून दूरच राहत होता. आम्ही वेगळेच आयुष्य जगत होतो,” असे त्यांनी स्पष्ट केले. तसेच, आरोपीवर यापूर्वीही गंभीर आरोप झाले असल्याची कबुली देत, काही गोष्टी माहिती असल्याचेही त्यांनी मान्य केले. Nasarapur News
मात्र, गावकऱ्यांकडून करण्यात आलेले काही आरोप त्यांनी फेटाळले. “माझ्या मुलींवर अत्याचार केल्याच्या बातम्या चुकीच्या आहेत. अशी घटना घडली असती, तर मी स्वतः तक्रार केली असती,” असे त्यांनी ठामपणे सांगितले.
दरम्यान, आरोपीच्या मुलानेही संतप्त प्रतिक्रिया देत वडिलांच्या कृत्याचा निषेध केला. “त्याने केलेल्या गुन्ह्याबद्दल त्याला तात्काळ फाशीची शिक्षा व्हावी,” अशी मागणी करत, “तो माझा बाप आहे हेच माझं दुर्दैव,” असेही त्याने स्पष्ट शब्दांत म्हटले. भूतकाळातील काही घटनांमुळे आपण त्याच्याशी संबंध तोडल्याचेही त्याने सांगितले.
या घटनेमुळे नसरापूरसह संपूर्ण भोर तालुक्यात संतापाचे वातावरण असून, आरोपीला कठोर शिक्षा व्हावी यासाठी नागरिकांकडून आंदोलन, मोर्चे आणि बंदचे आवाहन करण्यात येत आहे. प्रशासनानेही या प्रकरणाची गंभीर दखल घेत तपास जलदगतीने सुरू असल्याची माहिती दिली आहे. Nasarapur News
