नारायणगाव, (पुणे) : पिस्तूल व कोयत्याचा धाक दाखवुन दहशत निर्माण करणाऱ्या तरुणाला नारायणगाव पोलिसांनी मोठ्या शिताफीने ताब्यात घेतले आहे.
अनिल सुनील जाधव (वय – २०, रा. ठाकरवस्ती, वारुळवडी, ता. जुन्नर) असे अटक करण्यात आलेल्या आरोपीचे नाव आहे.
पोलिसांनी दिलेल्या माहितीनुसार, बुधवारी रात्री अकरा वाजण्याच्या सुमारास वारुळवाडी येथील ठाकरवाडीकडे जाणाऱ्या रस्यावर कमरेला पिस्तूल असलेला तरुण हातात कोयता घेऊन हातवारे करून धाक दाखवुन दहशत निर्माण करत असल्याची माहिती पोलिसांना मिळाली होती.
मिळालेल्या माहितीनुसार सदर घटनेच्या परिस्थितीचे गांभीर्य ओळखून नारायणगाव पोलिसांच्या पथकाने तातडीने घटनास्थळी जाऊन तरुणाला ताब्यात घेतले. त्याच्या ताब्यातील पिस्तूल व कोयता जप्त केला. तपासणी केली असता पिस्तूल बनावट असल्याचे निष्पन्न झाले.
दरम्यान, सोशल मीडियावर कोयता गॅंगचे व्हिडिओ पाहून दहशत निर्माण करण्यासाठी या तरुणांनी हे कृत्य केले असल्याची प्राथमिक माहिती पोलीस तपासात निष्पन्न झाली आहे.
