Model Death Case : भोपाळमध्ये एका प्रसिद्ध मॉडेलच्या संशयास्पद मृत्यूने संपूर्ण शहर हादरले आहे. मृत महिलेचं नाव खुशबू अहिरवार असं असून ती सोशल मीडियावर ‘डायमंड गर्ल’ या नावाने ओळखली जायची. खुशबूच्या मृत्यूनंतर तिच्या कुटुंबीयांनी तिचा प्रियकर कासिम याच्यावर गंभीर आरोप केले आहेत. कुटुंबीयांच्या म्हणण्यानुसार, कासिमने खुशबूला रुग्णालयात सोडलं आणि त्यानंतर तो फरार झाला. ही घटना इंदौर रोडवरील भैंसाखेडी परिसरात घडली असून पोलिसांनी या प्रकरणाचा तपास सुरू केला आहे.
खुशबूच्या शरीरावर अनेक ठिकाणी जखमा आढळल्या असून, विशेषतः तिच्या चेहऱ्यावर, खांद्यावर आणि प्रायव्हेट पार्टवर जखमेचे निशाण असल्याचा आरोप तिच्या कुटुंबीयांनी केला आहे. पोलिसांनी मृतदेह ताब्यात घेऊन गांधी मेडिकल कॉलेजमध्ये शवविच्छेदनासाठी पाठवला आहे. प्राथमिक तपासात या प्रकरणामागे प्रेमसंबंधातील वादाचा संशय व्यक्त केला जात आहे. दरम्यान, आरोपी कासिम हा उज्जैनचा रहिवासी असून पोलिसांनी त्याचा शोध सुरू केला आहे.
खुशबू सोशल मीडियावर अत्यंत सक्रिय होती. तिच्या इंस्टाग्रामवर जवळपास 12 हजार फॉलोअर्स होते. ती कासिमसोबत लिव्ह-इन रिलेशनशिपमध्ये राहत होती. तिचं मूळ नाव खुशी वर्मा असून ‘डायमंड गर्ल’ या नावाने ती मॉडेलिंग क्षेत्रात ओळखली जायची. खुशबूने बीएच्या पहिल्या वर्षानंतर शिक्षण सोडलं आणि मागील तीन वर्षांपासून ती भोपाळमध्ये राहत होती. ती स्थानिक बँड्ससाठी मॉडलिंग करत होती आणि पार्ट-टाइम जॉब करून स्वतःचा खर्च भागवत होती.
खुशबूच्या आई लक्ष्मी अहिरवार यांनी सांगितलं की, तीन दिवसांपूर्वी कासिमने त्यांना फोन करून सांगितलं होतं की तो मुस्लिम आहे, पण खुशबू त्याच्यासोबत सुरक्षित आहे आणि ते दोघं उज्जैनला जात आहेत. मुलीनेही आईला खात्री दिली होती की, कासिम चांगला मुलगा आहे आणि ती त्याच्यासोबत सुखात आहे. मात्र, काही दिवसांतच खुशबूच्या मृत्यूची बातमी मिळाल्याने कुटुंबीयांवर शोककळा पसरली आहे.
या घटनेनंतर पोलिसांनी विविध अंगांनी तपास सुरू केला आहे. कासिमच्या हालचालींचा मागोवा घेण्यासाठी सीसीटीव्ही फुटेज तपासले जात आहेत. प्राथमिक तपासात ही घटना ‘लव्ह जिहाद’शी संबंधित असल्याची शक्यता वर्तवली जात आहे. मात्र, पोलिसांनी अधिकृतपणे याबाबत काहीही सांगितलेले नाही. या प्रकरणाने भोपाळमध्ये खळबळ उडाली असून सर्वांचे लक्ष या तपासाकडे लागले आहे.
