इंदापूर : इंदापूर पोलिस ठाण्याच्या हद्दीतील गागरगाव परिसरात घरात कोणी नसल्याचा फायदा घेत एका मतिमंद अल्पवयीन मुलीवर बलात्कार केल्याची घटना सोमवारी (ता. २०) सायंकाळी ६ वाजण्याच्या सुमारास घडली आहे. याप्रकरणी पोलिसांनी आरोपीला अटक केली असून विविध कलमांतर्गत गुन्हा दाखल केला आहे.
दत्तू नामदेव काळेल (वय-४८, रा. काळेल वस्ती, बिजवडी, ता. इंदापूर) असे आरोपीचे नाव आहे. याप्रकरणी पीडितेच्या आईने मंगळवारी (ता. २१) इंदापूर पोलीस ठाण्यात फिर्याद दिली आहे.
बारामती उपविभागीय पोलीस अधिकारी गणेश इंगळे यांनी दिलेल्या माहितीनुसार, फिर्यादी या देवदर्शानासाठी बाहेरगावी गेल्या होत्या. यावेळी घरात १५ वर्षीय अल्पवयीन मुलगी एकटीच होती. घरात कोणी नसल्याचा फायदा घेत आरोपीने अल्पवयीन मुलीवर बलात्कार केला. पिडीतेची आई देवदर्शनावरून घरी आल्या तेव्हा घराची कडी उघडून आरोपीने फिर्यादीला धक्का देत तेथून पळ काढला.
घराची कडी आतून लावत आरोपीने आपल्यावर बलात्कार केल्याचे पिडीतेने आपल्या आईला सांगितले. या घटनेचा अधिक तपास बारामती उपविभागीय पोलीस अधिकारी गणेश इंगळे करीत आहेत.
