Loni Kalbhor लोणी काळभोर, ता. १२ : तब्बल ७५ लाखांच्या स्थावर तारण कर्जप्रकरणात लोणी काळभोर परिसरात मोठी खळबळ उडाली आहे. थकबाकीमुळे प्रशासनाच्या आदेशानुसार सील करण्यात आलेल्या मालमत्तेचे कुलूप तोडून कर्जदारानेच पुन्हा अनधिकृतपणे प्रवेश केल्याचा धक्कादायक प्रकार समोर आला आहे. या घटनेनंतर संबंधित पतसंस्थेने थेट पोलिसांत धाव घेतली असून, लोणी काळभोर पोलीस ठाण्यात एकावर गुन्हा दाखल करण्यात आला आहे. Loni Kalbhor
डॅनिअल दिनकर पवार (रा. होरेबनगर, लोणी स्टेशन, कदमवाकवस्ती) असे गुन्हा दाखल करण्यात आलेल्या आरोपींचे नाव आहे. याप्रकरणी अभिनव चेतना नागरी सहकारी पतसंस्थेच्या व्यवस्थापिका प्रतिभा राहुल तुपे (वय ४६, रा. साडेसतरा नळी, हडपसर) यांनी लोणी काळभोर पोलिस ठाण्यात फिर्याद दिली आहे. दरम्यान, सहकारी पतसंस्थांच्या वसुली प्रक्रियेत अशा प्रकारे कायद्याला आव्हान देण्याच्या घटनांमुळे प्रशासन आणि वित्तीय संस्थांमध्ये चिंतेचे वातावरण निर्माण झाले आहे. Loni Kalbhor
पोलिसांनी दिलेल्या माहितीनुसार, डॅनिअल पवार यांनी ३ जुलै २०१५ रोजी त्यांच्या मालकीच्या मालमत्तेवर तारण ठेवून घरदुरुस्ती आणि घरबांधणीसाठी २५ लाखांचे कर्ज घेतले होते. त्यानंतर २०१७ मध्ये त्यांच्या कुटुंबीयांच्या नावावर आणखी दोन कर्जे मंजूर करण्यात आली. अशाप्रकारे एकूण ७५ लाखांचे स्थावर तारण कर्ज पतसंस्थेकडून वितरित करण्यात आले होते.मात्र, कालांतराने कर्जाची मोठी थकबाकी निर्माण झाली. पतसंस्थेकडून वारंवार नोटिसा देऊनही कर्जदारांनी रक्कम न भरल्याने अखेर महाराष्ट्र सहकारी संस्था अधिनियम १९६० अंतर्गत कायदेशीर कारवाई सुरू करण्यात आली. Loni Kalbhor
जिल्हाधिकारी आणि जिल्हादंडाधिकारी पुणे तसेच अप्पर तहसीलदार लोणी काळभोर यांच्या आदेशानुसार पतसंस्थेच्या अधिकाऱ्यांनी पोलिस बंदोबस्तात संबंधित मालमत्तेचा ताबा घेतला. २१ जुलै २०२५ रोजी अधिकृत कारवाई करून मालमत्तेला कुलूप लावून सील करण्यात आले होते. या कारवाईवेळी विशेष वसुली अधिकारी, पतसंस्थेचे प्रतिनिधी आणि लोणी काळभोर पोलिस उपस्थित होते. प्रशासनाने कायदेशीर प्रक्रियेनुसार ताबा घेतल्याने हे प्रकरण त्या वेळी चर्चेत आले होते. Loni Kalbhor
दरम्यान, काही दिवसांनी संबंधित कर्जदार डॅनिअल पवार यांनी कोणतीही लेखी परवानगी न घेता मालमत्तेचे सील आणि कुलूप तोडून पुन्हा त्या ठिकाणी प्रवेश केल्याचे समोर आले. ३० जुलै रोजी हा प्रकार पतसंस्थेच्या निदर्शनास आला. यानंतर पतसंस्थेकडून त्यांना वारंवार ताबा सोडण्यास सांगण्यात आले. मात्र, त्यांनी आदेशांकडे दुर्लक्ष करत मालमत्ता रिकामी करण्यास नकार दिल्याने अखेर पोलिसांत तक्रार दाखल करण्यात आली. या प्रकरणी लोणी काळभोर पोलिसांनी डॅनिअल दिनकर पवार यांच्याविरोधात भारतीय न्याय संहिता (BNS) कलम ३२९(३) आणि ३२९(४) अंतर्गत गुन्हा दाखल केला आहे. Loni Kalbhor
