Loni Kalbhor News लोणी काळभोर : लोणी काळभोर पोलिसांनी खुनाचा कट उधळून लावत मोठी कारवाई केली. पोलिसांनी ही कारवाई कुंजीरवाडी (ता. हवेली) ग्रामपंचायत हद्दीतील नायगाव फाटा येथे करत तीन सराईत गुन्हेगारांना शुक्रवारी (ता.२१) हत्यारासह अटक केली आहे. दरम्यान, आरोपींना न्यायालयात हजर केले असता, न्यायालयाने आरोपींना पोलीस कोठडी सुनावली आहे. (Loni Kalbhor News)
तानाजी भाऊसाहेब गावडे (वय-२४, कुंजीरवाडी, माळवाडी, ता. हवेली, जि. पुणे) गणेश साहेबराव महाळनर (वय २०, धंदा मजुरी, मुळ रा. शेलकुड, ता. अहमदपुर, जि.लातुर सध्या कुंजरवाडी, ता. हवेली, जि.पुणे) व महेश विजय महारनवर (वय २१, धंदा ड्रायव्हर, सध्या रा. पिराचे मंदिराजवळ, म्हातोबाची आळंदी, ता. हवेली, जि.पुणे मुळ रा. तरडगांव, ता. कर्जत, जि. अहमदनगर) अशी अटक करण्यात आलेल्या आरोपींची नावे आहेत.
लोणी काळभोर पोलीस ठाण्याचे वरीष्ठ पोलीस निरीक्षक दत्तात्रय चव्हाण यांनी दिलेल्या माहितीनुसार, लोणी पोलीस ठाण्यातील टाऊन मार्शलमधील पोलीस अंमलदार सुतार व पाटील कर्त्यव्य बजावत असताना शुक्रवारी (ता.२१) पोलीस नियंत्रण कक्षाला फोन आला की, कुंजीरवाडी येथे काही इसम कोयते काढुन दहशत माजवत आहेत. मिळालेल्या माहितीच्या अनुषंगाने, पोलिस तातडीने घटनास्थळी दाखल झाले. तेव्हा पोलिसांना त्या ठिकाणी काही इसम आरडाओरडा करत होते. तर त्यातील दोन इसम त्यांच्या हातातील कोयते हवेत फिरवून ‘आज गणेश चौधरी याला संपवुन टाकतो’, असे म्हणुन जोरजोरात ओरडत होते. (Loni Kalbhor News)
दरम्यान, आरोपींना पोलीस आल्याची चाहूल लागताच, आरोपींनी पळ काढला. मात्र, पोलिसांनी मोठ्या शिताफीने पाठलाग करून तिन्ही आरोपींना ताब्यात घेतले. आरोपींची अंगझडती घेतली असता, त्यांच्याकडून पोलिसांनी दोन धारधार लोखंडी कोयते जप्त केले.
याप्रकरणी आरोपींच्या विरोधात लोणी काळभोर पोलीस ठाण्यात गुन्हा दाखल करण्यात आला आहे. त्यानंतर पोलिसांनी आरोपींना न्यायालयात हजर केले असता न्यायालयाने आरोपींना पोलीस कोठडी सुनावली आहे. पुढील तपास पोलीस उपनिरीक्षक विष्णु देशमुख करत आहेत.
सदरची लोणी काळभोर पोलीस ठाण्याचे वरिष्ठ पोलीस निरीक्षक दत्तात्रय चव्हाण, पोलीस निरीक्षक (गुन्हे) सुभाष काळे यांच्या मार्गदशनाखाली पोलीस उपनिरीक्षक अमित गोरे, हनुमंत तरटे, विष्णु देशमुख, पोलीस अंमलदार बनकर, सुतार, पाटील, कुदळे, शिरगीरे यांच्या पथकाने केली आहे.
