Loni Kalbhor News: लोणी काळभोर, ता. 1 : घरासमोर लघुशंका करताना हटकल्याने एका परप्रांतीय शिक्षकाने शिवीगाळ, दमदाटी करून शेतकऱ्याला मारहाण केल्याची घटना घडली आहे. ही घटना कुंजीरवाडी (ता. हवेली) ग्रामपंचायत हद्दीतील थेऊर फाटा परिसरात शनिवारी (ता.29) रात्री अकरा वाजण्याच्या सुमारास घडली आहे. लोणी काळभोर पोलीस ठाण्यात परप्रांतीय शिक्षकाच्या विरोधात गुन्हा दाखल करण्यात आला आहे.
हेही वाचा- पुणे-भिगवण रेल्वेमार्गावर ‘स्वयंचलित सिग्नल यंत्रणा’; प्रवाशांच्या वेळेत होणार बचत
शिवाजी कांतीलाल काळभोर (वय 43, या. कुंजीरवाडी, थेऊरफाटा ता. हवेली) असे मारहाण झालेल्या शेतकऱ्याचे नाव आहे. तर आनंद मोहन कुलकर्णी (वय 38, रा. घर नंबर 79, सुहाग कॉलनी, विजापुर, कर्नाटक) असे गुन्हा दाखल करण्यात आलेल्या शिक्षकाचे नाव आहे.
पोलिसांनी दिलेल्या माहितीनुसार, शिवाजी काळभोर हे एक प्रगतशील शेतकरी आहेत. काळभोर हे शनिवारी शेतातील गव्हाला पाणी देण्यासाठी गेले होते. शेतातील काम आटोपून ते शनिवारी रात्री अकरा वाजण्याच्या सुमारास घरी आले. तेव्हा काळभोर यांना घरासमोर एक लघवी करताना आढळून आला. काळभोर यांनी त्या व्यक्तीला येथे लघुशंका का करता? असे सांगून हटकले.
लघुशंका करताना हटकल्या राग आल्याने आनंद कुलकर्णी काळभोर यांना म्हणाले, तु मला विचारणारा कोण? असे म्हणून काळभोर यांना शिवीगाळ करून हाताने व ठोस्याने मारहाण केली. तसेच पाठीमागून जोराचा धक्का दिल्याने काळभोर खाली पडल्याने त्यांच्या कपाळाला, नाकाला, ओठाला मार लागुन मोठा रक्तस्त्राव झाला. पुढील तपास वरिष्ठ पोलिस निरीक्षक राजेंद्र पन्हाळे यांच्या मार्गदर्शनाखाली पोलीस हवालदार शिवाजी शिंदे हे करत आहेत.
