Loni Kalbhor News | लोणी काळभोर, (पुणे) : चारचाकी गाडीचे हप्ते थकल्याचे सांगून तिघांनी चारचाकी गाडी जबरदस्तीने चोरुन नेण्याचा प्रयत्न केल्याची घटना घडली आहे. पुणे – सोलापूर राष्ट्रीय महामार्गाववरील उरुळी कांचन ते सोरतापवाडी परिसरात शुक्रवारी (ता. १२) सायंकाळी साडेपाच वाजण्याच्या सुमारास हि घटना घडली आहे.
याबाबत कृष्णा हरीदास कदम (वय २८, रा. हनुमानवाडी, केळगाव) यांनी लोणी काळभोर पोलिसांकडे फिर्याद दिली आहे. याप्रकरणी लोणी काळभोर पोलिसांनी तिघांवर गुन्हा दाखल केला आहे.
पोलिसांनी दिलेल्या माहितीनुसार, फिर्यादी व त्यांचे दोन मित्र कारमधून जात होते. यावेळी पांढर्या रंगाच्या ब्रेझा कारने त्यांना ओव्हर टेक करुन थांबण्याचा इशारा केला. फिर्यादी यांनी गाडी थांबविल्यावर त्या कारमधून तिघे उतरले. त्यांनी फिर्यादी यांना शिवीगाळ करुन आमच्या गाडीला कट मारुन आला काय असे बोलून फिर्यादीच्या कानशिलात मारली. फिर्यादीचा मित्र सचिन नावडकर यांच्या कानातील सोन्याची बाळी हिसकावू लागला. तेव्हा मित्राने त्यास ढकलून बाजूला केले.
त्यावर दुसरा पुढे येऊन फिर्यादीला म्हणाला, तुमच्या गाडीचे किती हप्ते थकले आहेत माहित आहे का?? लय मस्ती आल्यासारखे वागू नका. आता तुमची गाडीच जमा करतो असे बोलून जबरदस्तीने गाडीचे ड्रायव्हिंग सीटवर बसून गाडी पळवून नेण्याचा प्रयत्न केला.
दरम्यान, तेवढ्यात फिर्यादी व त्यांच्या मित्रांनी प्रतिकार करुन आरडाओरडा केल्याने तसेच इतर येणारी जाणारी वाहने थांबल्याने ते तिघे पळून गेले. पोलीस उपनिरीक्षक अमित गोरे तपास करीत आहेत.
अधिक बातम्या वाचण्यासाठी येथे क्लिक करा….!
