Kolhapur : कोल्हापूरच्या भुदरगड तालुक्यात प्रेमविवाहानंतरही सासरच्या लोकांकडून होणाऱ्या छळाला कंटाळून एका २८ वर्षीय विवाहितेने आत्महत्या केल्याची अत्यंत दुःखद घटना घडली आहे. या प्रकरणी विवाहितेच्या पतीला आणि सासूला पोलिसांनी तात्काळ अटक केली असून, या घटनेने जिल्ह्यात मोठी खळबळ उडाली आहे. मृतांमध्ये एका अवघ्या पाच महिन्यांच्या बाळाच्या आईचा समावेश असल्याने परिसरात हळहळ व्यक्त होत आहे. Kolhapur
पती आणि सासूकडून अमृताचा मानसिक व शारीरिक छळ
पोलिसांनी दिलेल्या माहितीनुसार, अमृता राहुल खोत (वय २८) असे मृत विवाहितेचे नाव आहे. देऊळवाडी येथील अमृताचा म्हसवे येथील राहुल राजेंद्र खोत याच्यासोबत २०२० मध्ये प्रेमविवाह झाला होता. लग्नाच्या सुरुवातीची दीड-दोन वर्षे त्यांचा संसार सुखात चालला; मात्र त्यानंतर पती राहुल आणि सासू अनिता खोत यांनी अमृताचा मानसिक व शारीरिक छळ सुरू केला. घर बांधण्यासाठी माहेरून दोन ते तीन लाख रुपये आणण्याची त्यांनी वारंवार मागणी केली. या पैशाच्या मागणीवरून आणि सततच्या अपमानास्पद बोलण्यामुळे अमृता त्रस्त झाली होती.
सासू आणि पतीच्या सततच्या त्रासाला कंटाळून अमृताने १३ नोव्हेंबर रोजी राहत्या घरातच विषारी औषध प्राशन केले. तिची प्रकृती बिघडल्यानंतर तिला उपचारासाठी रुग्णालयात दाखल करण्यात आले. मात्र, उपचारादरम्यान २३ नोव्हेंबर रोजी तिचा दुर्दैवी मृत्यू झाला. अमृताच्या वडिलांनी दिलेल्या फिर्यादीवरून भुदरगड पोलिसांनी पती राहुल खोत आणि सासू अनिता खोत यांच्याविरुद्ध गुन्हा दाखल करून दोघांनाही अटक केली आहे. न्यायालयाने त्यांना कोठडी सुनावली असून, पोलीस या प्रकरणाचा अधिक तपास करत आहेत. या घटनेमुळे पाच महिन्यांच्या चिमुकल्याला आईचे छत्र हरपले आहे.
