लोणी काळभोर : पूर्वी झालेल्या भांडणाचा राग मनात धरून 18 वर्षीय तरुणाला रस्त्यात अडवून शिवीगाळ करत जीवे मारण्याची धमकी देत धारदार लोखंडी हत्याराने हल्ल्याचा प्रयत्न केल्याची धक्कादायक घटना घडली आहे. ही घटना मांजरी बुद्रुक (ता. हवेली) ग्रामपंचायत हद्दीत 25 ऑगस्ट रोजी रात्री बारा सुमारास घडली. या प्रकारामुळे परिसरात काही काळ भीतीचे वातावरण निर्माण झाले.
याप्रकरणी समर्थ हनुमंत क्षीरसागर (वय 18 , रा. सटवाई नगर, मांजरी बु.) याने मांजरी पोलीस ठाण्यात फिर्याद दिली आहे. त्यानुसार सौरभ आण्णा नेटके, विशाल दयानंद तोरणे, दत्ता महादेव झेंडे, यश बाळासाहेब भगत, स्वराज सत्यवान अडसुळ, रिहान बबलू सय्यद व इतर यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, काही दिवसांपूर्वी समर्थचा मित्र युवराज भोसले याचे वडील तानाजी भोसले यांना सौरभ आण्णा नेटके याने लाथाबुक्क्यांनी मारहाण केली होती. त्यावेळी समर्थ आणि युवराज यांनी घटनास्थळी जाऊन तानाजी भोसले यांना सोडविण्याचा प्रयत्न केला. या घटनेचा राग सौरभच्या मनात राहिला. त्याने समर्थला ‘तुला मी बघून घेतो’ अशी धमकी दिल्याचा आरोप आहे. त्यानंतर दोन्ही कुटुंबांमध्ये चर्चा करून वाद मिटविण्यात आला होता. मात्र, तरीही सौरभ वेळोवेळी भेटेल तिथे ‘तुला सोडणार नाही, तुला मारणारच’ अशी धमकी देत असल्याचे फिर्यादीत नमूद आहे.
समर्थ घरी झोपलेला असताना त्याचा लहान भाऊ ज्ञानेश्वर याचा फोन आला. ‘सौरभ आण्णा नेटके आणि त्याच्यासोबतचे काही जण तुला मारण्यासाठी घरी येणार आहेत, तू घरी थांबू नकोस,’ असे भावाने सांगितल्याचे समर्थने फिर्यादीत म्हटले आहे. घाबरलेल्या समर्थने घर सोडून मित्र युवराज भोसले याच्या घरी जाण्याचा निर्णय घेतला. मात्र, मांजराई देवी मंदिराशेजारील रस्त्यावर रात्री सुमारे बारा वाजण्याच्या सुमारास त्याला संबंधितांनी अडवले. आरोपींनी समर्थला अडवून ‘तू जास्त नाटक करत होतास, तुझी बऱ्याच दिवसांपासून वाट पाहत होतो, आज तुझा गेम वाजवून टाकणार’ असे म्हणत शिवीगाळ करण्यास सुरुवात केली.
समर्थने संबंधितांना समजावून सांगत माफी मागितली आणि जुना विषय सोडून देण्याची विनंती केली. मात्र, आरोपींनी त्याचे म्हणणे ऐकून घेतले नाही, असा आरोप आहे. त्यानंतर आरोपींनी त्यांच्या पॅन्टमध्ये लपवून ठेवलेली लोखंडी धारदार हत्यारे बाहेर काढली आणि हवेत फिरवत परिसरात दहशत निर्माण केल्याचा आरोप समर्थने केला आहे. यावेळी ‘आम्ही इथले भाई आहोत, आमचे कोणीही वाकडे करू शकत नाही,’ असे म्हणत सौरभ नेटके याने हातातील धारदार हत्यार समर्थवर उगारला. मात्र, समर्थने प्रसंगावधान राखत वेळीच खाली वाकल्याने हत्याराचा वार चुकला.
या प्रकारामुळे रस्त्यावरून ये-जा करणाऱ्या नागरिकांमध्ये घबराट निर्माण झाली आणि नागरिकांची पळापळ सुरू झाली होती. या घटनेनंतर समर्थने घरी जाऊन आईला प्रकाराची माहिती दिली आणि त्यानंतर मांजरी पोलीस ठाण्यात धाव घेत तक्रार दाखल केली. पूर्वीच्या भांडणाच्या रागातून आरोपींनी संगनमत करून आपल्याला मारण्याच्या उद्देशाने अडवले, शिवीगाळ करून जीवे मारण्याची धमकी दिली आणि धारदार हत्यारे दाखवत परिसरात दहशत निर्माण केली, असा आरोप समर्थ क्षीरसागर याने केला आहे.
