पुणे : वानवडी परिसरात दहशत माजविणाऱ्या गुंडाची १ वर्षाकरिता कोल्हापुरातील कारागृहात रवानगी करण्यात आली असून ही कारवाई पोलीस आयुक्त अमिताभ गुप्ता यांनी केली आहे. पोलीस आयुक्तांच्या आदेशानुसार आतापर्यंत शहरातील ८४ गुंडांच्या विरोधात एमपीडीए कारवाई करण्यात आली आहे. अजय विजय उकिरडे (वय २०, रा. रामटेकडी, हडपसर) असे कारवाई केलेल्या गुंडाचे नाव आहे.
पोलिसांनी दिलेल्या माहितीनुसार, आरोपी अजय उकिरडे हा वानवडी भागात दहशत माजवून नागरिकांना त्रास देत होता. उकिरडे याच्या विरोधात शस्त्र बाळगणे, दहशत माजविणे, जबरी चोरी असे गंभीर गुन्हे दाखल करण्यात आले आहेत. त्याच्या विरोधात पोलिसांनी प्रतिबंधक कारवाई करून देखील त्याच्या वर्तवणुकीत सुधारणा होत नव्हती. त्यामुळे वानवडी पोलिसांनी उकिरडे याच्या विरोधात झोपडपट्टी दादा प्रतिबंधक कायद्यान्वये कारवाई करण्याचा प्रस्ताव तयार केला होता.
हा प्रस्ताव वरिष्ठ पोलीस निरीक्षक दीपक लगड यांनी पोलीस आयुक्त गुप्ता यांच्याकडे प्रस्ताव सादर केला होता. त्याच्यावर कायद्याचा वचक बसावा. म्हणून पोलीस आयुक्त अमिताभ गुप्ता यांनी झोपडपट्टी दादा प्रतिबंधक कायद्यान्वये (एमपीडीए) कारवाई करण्याचे आदेश दिले. त्यानुसार गुंडाला कोल्हापुरातील कारागृहात वर्षभरासाठी स्थानबद्ध करण्यात येणार आहे.
