हिंगोली : जिल्ह्यातील कळमनुरी तालुक्यातील खरवड मन हेलावून टाकणारी घटना समोर आली आहे. कौटुंबिक वादातून पतीने आपल्या पत्नीची निर्घृण हत्या केली, सासूवर जीवघेणा हल्ला केला आणि त्यानंतर स्वतःही गळफास घेऊन आत्महत्या केली असल्याची माहिती समोर आली आहे.या दुर्देवी घटनेमुळे संपूर्ण परिसरात तीव्र संताप आणि खळबळ उडाली आहे.
मिळालेल्या माहितीनुसार, खरवड येथील दीपाली पाईकराव हिचा विवाह काही दिवसांपूर्वीच विशाल डोंगरे याच्याशी झाला होता. लग्नानंतर सुरुवातीचे काही दिवस व्यवस्थित गेले, परंतु त्यानंतर विशालने दीपालीला त्रास देण्यास सुरुवात केली. पतीच्या त्रासाला कंटाळून दीपाली मागील काही दिवसांपासून खरवड येथे आपल्या आईकडे (माहेरी) राहण्यासाठी आली होती.
बुधवारी सायंकाळच्या सुमारास विशाल तिच्या माहेरी पोहोचला. त्या वेळी दीपाली आणि तिची आई कमलबाई या दोघीच घरी होत्या. “तू माझ्यासोबत सासरी न राहता माहेरी का राहत आहेस?” या कारणावरून विशाल आणि दीपाली यांच्यात जोरदार शाब्दिक वाद झाला. संतापाच्या भरात विशालने खाटेच्या लाकडी ठोकळ्याने दीपालीवर जोरदार वार केले. या भीषण हल्ल्यात गंभीर दुखापत झाल्यामुळे दीपालीचा जागीच मृत्यू झाला.
दरम्यान, मुलीला वाचवण्यासाठी आणि भांडण सोडवण्यासाठी मध्यस्ती करणाऱ्या सासू कमलबाई यांच्यावरही विशालने प्राणघातक हल्ला केला. यात त्या गंभीर जखमी झाल्या असून, त्यांच्यावर सध्या रुग्णालयात वैद्यकीय उपचार सुरू आहेत.
पत्नीची हत्या केल्यानंतर आणि सासूला रक्तबंबाळ स्थितीत सोडल्यानंतर आरोपी विशाल डोंगरे याने घटनास्थळापासून काही अंतरावर असलेल्या एका झाडाला गळफास लावून आपले जीवन संपवले. घटना घडल्यानंतर गुरुवारी कळमनुरी पोलीस ठाण्यात या प्रकरणी रीतसर गुन्हा दाखल करण्यात आला आहे. वरिष्ठ पोलीस अधिकाऱ्यांनी घटनास्थळी भेट देऊन पाहणी केली असून, कळमनुरी पोलीस या घटनेचा पुढील अधिक तपास करत आहेत.
