Crime : मॅट्रिमोनियल साईट्सवरून जोडीदार शोधताना सावधगिरी बाळगण्याची गरज पुन्हा एकदा अधोरेखित करणारी धक्कादायक घटना मध्य प्रदेशातील इंदूर येथे उघडकीस आली आहे. लग्नाच्या नावाखाली फसवणूक करून एका वकिलाच्या घरातून सुमारे 25 तोळे सोन्या-चांदीचे दागिने लंपास केल्याचा प्रकार समोर आला आहे. विशेष म्हणजे, या कटात सहभागी असलेली महिला आणि तिचा कथित ‘भाऊ’ प्रत्यक्षात आधीपासूनच पती-पत्नी असल्याचे तपासात स्पष्ट झाले आहे.
इंदूरमधील खुडैल पोलीस ठाण्याच्या हद्दीत राहणाऱ्या एका वकिलाची ओळख काही महिन्यांपूर्वी एका मॅट्रिमोनियल साईटवरून निर्मला सेंगर नावाच्या महिलेशी झाली. काही दिवसांच्या संवादानंतर दोघांनी विवाह करण्याचा निर्णय घेतला. सुरुवातीला सर्व काही सुरळीत सुरू होते. लग्नानंतर काही दिवसांनी एक तरुण त्या वकिलाच्या घरी आला. पत्नीने त्याची ओळख “माझा भाऊ शुभम सेंगर” अशी करून दिली. घरातील व्यक्ती असल्याने वकिलानेही त्याच्यावर विश्वास ठेवला आणि तो घरात ये-जा करू लागला.
मात्र काही दिवसांनी अचानक पत्नी आणि तिचा कथित भाऊ दोघेही घरातून गायब झाले. त्याच वेळी घरातील कपाटात ठेवलेले सुमारे 25 तोळे सोन्या-चांदीचे दागिनेही गायब असल्याचे लक्षात आले. सुरुवातीला हा प्रकार समजून न आल्याने वकिलाने शोधाशोध केली. परंतु दोघांचाही मागमूस लागला नाही. शेवटी त्यांनी पोलिसांकडे तक्रार दिल्यानंतर तपास सुरू झाला.
तपासादरम्यान उघडकीस आलेली माहिती आणखी धक्कादायक होती. ज्याला वकिलाने ‘मेहुणा’ समजले, तो प्रत्यक्षात निर्मला सेंगरचा पहिलाच पती असल्याचे समोर आले. दोघांचे 2024 मध्येच लग्न झाले होते. पोलिसांच्या मते, या दोघांनी मॅट्रिमोनियल साईटचा वापर करून बनावट लग्नाचा सापळा रचला आणि आर्थिक फसवणूक करण्याचा कट आखला.
ग्रामीण विभागाचे डीएसपी नितीन सिंह यांनी सांगितले की, या प्रकरणात फसवणुकीचा गुन्हा दाखल करण्यात आला असून आरोपींचा शोध सुरू आहे. या घटनेमुळे ऑनलाईन मॅट्रिमोनियल प्लॅटफॉर्मवर जोडीदार निवडताना पार्श्वभूमी तपासणे, कागदपत्रांची पडताळणी करणे आणि घाईने निर्णय न घेणे किती महत्त्वाचे आहे, हे पुन्हा स्पष्ट झाले आहे.
