राहुलकुमार अवचट
यवत : पुणे – सोलापूर महामार्गावरील यवत ग्रामपंचायत हद्दीत रेशनच्या धान्याचा काळाबाजार करणारी टोळी स्थानिक गुन्हे शाखेकडून जेरबंद करण्यात आली आहे. त्यांच्याकडून पोलिसांनी तीन मालवाहतूक टेम्पो व धान्य असा १२ लाख ७३ हजार २५० रुपयांचा मुदेमाल जप्त केला आहे.
मुकेश नरसिंगराव माधव (वय – २१ रा. बिबेवाडी वोटा नं १०९, सुहाग मंगल कार्यालय ता. हवेली), भाऊसाहेब अर्जुन कुटे वय ३७, रा. नाईस प्लॉट, कॅनॉल जवळ चारभुजा सायकल मार्टचे पाठीमागे, गुलटेकडी ता. हवेली), सादिक इलाहीबक्ष अलबेलकर वय ५५, रा. काशीवाडी, भवानी पेठ ता. हवेली) अशी अटक करण्यात आलेल्या आरोपींची नावे आहेत.
पोलिसांनी दिलेल्या माहितीनुसार, बेकायदेशीर रेशन धान्याची अफरातफर करत चोरट्या पद्धतीने वाहतूक व विक्री केली जात असल्याची माहिती स्थानिक गुन्हे शाखेचे पोलीस हवालदार सचिन घाडगे यांना एका खबऱ्याकडून मिळाली होती. मिळालेल्या माहिती वरिष्ठांना सांगितली. त्यानुसार वरिष्ठांनी दिलेल्या आदेशानुसार दौंडचे पुरवठा अधिकारी व यवत पोलीस स्टेशनचे प्रभारी अधिकारी यांना कळविण्यात आले. त्यानुसार स्थानिक गुन्हे शाखेच्या वतीने कासुर्डी टोलनाका येथे सापळा रचण्यात आला.
यावेळी मिळालेल्या माहितीनुसार पुण्याच्या दिशेने जाणारे तीन मालवाहतूक टेम्पो पकडण्यात आले. गाड्यांच्या चालकांना गाडीत असलेल्या मालासंबंधी विचारणा केली असता त्यांनी गाडीत गहू, तांदूळ, हरभरा असल्याचे सांगितले. यावेळी अधिक चौकशी केली असता चालकांकडे मालाशी संबंधित कोणतीच कागपत्रे नव्हती.
पोलिसांनी त्यांच्याकडे अधिक चौकशी केली असता त्यांनी जावेद लालू शेख, कासिम शेख व अमोल कंधारे, अब्बास अब्दुल सरकारवर (रा. तिघेही काशेवाडी, पुणे) यांचा माल असल्याची कबुली दिली. सदरचा माल वाहनचालक केडगाव येथील दुकानदार यांच्याकडे घेऊन जाणार असल्याचे देखील सांगण्यात आले. धान्याची पडताळणी केली असता ते रेशनिंगचेच असल्याची खात्री करण्यात आली.
दरम्यान, पंचांना बोलावून पंचनामा करण्यात आला. या तीनही वाहनांत मिळून १० हजार ८०० किलो रेशनिंगचे तांदूळ, ३०० किलो गहू, २५ किलो हरबरा असे रेशनिंगचे धान्य मिळून आले. त्यांच्याकडून पोलिसांनी तीन मालवाहतूक टेम्पो व धान्य असा १२ लाख ७३ हजार २५० रुपयांचा मुदेमाल जप्त केला आहे.
सदरची कारवाई ही पोलिस उपनिरीक्षक शिवाजी ननवरे, पोलिस हवालदार सचिन घाडगे, असिफ शेख, अजित भुजबळ, विजय कांचन, अजय घुले, धिरज जाधव यांच्या पथकाने केली आहे.
