Crime : नाशिक येथे खासगी बसच्या धडकेत झालेल्या अपघातात चेतन युवराज गांगुर्डे (वय 15) या शाळकरी विद्यार्थ्याचा मृत्यू झाला. ही घटना बुधवारी सकाळी सातपूर परिसरात घडली. या अपघातात दुचाकीस्वार गंभीर जखमी झाला असून त्याच्यावर शासकीय रुग्णालयात उपचार सुरू आहेत.
चेतन गांगुर्डे हा सातपूरच्या प्रबुद्ध नगर येथे राहत होता आणि सातपूर कॉलनी येथील मनपा माध्यमिक विद्यालयात इयत्ता 9वीत शिक्षण घेत होता. बुधवारी सकाळी तो शाळेसाठी निघाला असता, रस्त्यात एका दुचाकीस्वाराने त्याला लिफ्ट दिली. पुढे जात असताना खासगी बसने दुचाकीला धडक दिली. या धडकेत चेतन बसच्या चाकाखाली आल्याने त्याचा जागीच मृत्यू झाला. अपघातानंतर परिसरात नागरिकांनी गर्दी केली.
या घटनेनंतर प्रबुद्ध नगर परिसरात आणि शाळेत शोक व्यक्त करण्यात आला. चेतनच्या पश्चात अंध वडील, आई, धाकटा भाऊ आणि वृद्ध आजी असा परिवार आहे. शाळेनंतर मिळालेल्या वेळात तो कुटुंबाच्या उदरनिर्वाहासाठी काम करत होता.
दरम्यान, नाशिक शहरातील पंचवटी परिसरात अमली पदार्थविरोधी पथकाने कारवाई करत ऋषिकेश गणेश परसे उर्फ ऋषीबाबा (वय 23) याला अटक केली. त्याच्याकडून 1.5 ग्रॅम एमडी (मेफेड्रॉन) जप्त करण्यात आले. प्राथमिक तपासात हा पदार्थ इगतपुरी येथून आणल्याचे समोर आले आहे.
