पिंपरी-चिंचवड: तळेगाव दाभाडे येथील एका पेट्रोल पंपावर बुधवारी सायंकाळी साडेसहा-सातच्या सुमारास पंपावर उभे असलेल्या डिझेल टँकरला अचानक भीषण आग लागली. ही आग पेट्रोल पंपाच्या आवारातच लागल्याने परिसरात एकच खळबळ उडाली आणि नागरिकांची पळापळ सुरू झाली. मात्र, अग्निशमन दलाने अवघ्या 15 मिनिटांत दाखवलेल्या धाडसामुळे एका मोठ्या संभाव्य स्फोटाचा धोका टळला आहे.
तळेगाव दाभाडे येथील भारत पेट्रोलियम पंपावर नेहमीप्रमाणे इंधन वाहून नेणारा एक टँकर डिझेल रिकामे करण्यासाठी आला होता. सायंकाळी पावणेसातच्या सुमारास, टँकर उभा असताना अचानक त्याच्या मुख्य व्हॉल्वमधून आगीच्या ज्वाळा निघू लागल्या. परिस्थितीचे गांभीर्य ओळखून टँकर चालकाने जीवाची पर्वा न करता आग विझवण्यासाठी धाव घेतली. या प्रयत्नात तो किरकोळ भाजला असून त्याच्यावर जवळच्या रुग्णालयात उपचार सुरू आहेत.
आगीची माहिती मिळताच तळेगाव दाभाडे नगरपरिषदेचा अग्निशमन बंब घटनास्थळी दाखल झाला. सायंकाळची वेळ असल्याने रस्त्यावर मोठी वर्दळ होती आणि बघ्यांची गर्दीही जमली होती. अशा तणावाच्या स्थितीत अग्निशमन दलाने अवघ्या 15 मिनिटांत आगीवर नियंत्रण मिळवले.
