पुणे : पुणे शहरात 2022 मध्ये गाजलेल्या किडनी रॅकेट प्रकरणी एक खळबळजनक बाब उघडकीस आली आहे.या रॅकेटमध्ये ससून सर्वोपचार रुग्णालयातील तत्कालीन वैद्यकीय अधीक्षक डॉक्टर अजय तावरे यांचा सहभाग असल्याचं काही दिवसांपूर्वी उघड झालं होतं. त्यानंतर आता या प्रकरणी त्यांना पोलिसांनी ताब्यात घेतलं आहे.किडनी रॅकेट प्रकरणात ही मोठी कारवाई करण्यात आली आहे. आज अजय तावरेला न्यायालयात हजर केलं जाणार आहे.
याबाबत अधिक माहिती अशी की, रुबी हॉल क्लिनिकमधील किडनी रॅकेटमध्ये ससून सर्वोपचार रुग्णालयातील तत्कालीन वैद्यकीय अधीक्षक अजय तावरेचा सहभाग असल्याने समोर आल्यानंतर त्याला पुणे पोलिसांनी ताब्यात घेतलं. अजय तावरेला या गुन्ह्यात सह आरोपी करण्यात येणार असल्याची माहिती समोर आली आहे. तावरे सध्या पोर्शे अपघात प्रकरणात गेल्या वर्षभरापासून येरवडा कारागृहात न्यायालयीन कोठडीत आहे.
काय आहे नेमके प्रकरण?
कोल्हापूरमधील एका महिलेला कथितपणे १५ लाख रुपयांचे आमिष दाखवण्यात आले होते. तिने एका प्रत्यारोपणाची गरज असलेल्या पुरुषाची पत्नी असल्याचे खोटे भासवले आणि एका तरुण महिला रुग्णाला आपली किडनी दान केली. त्याच्या बदल्यात त्या तरुण महिलेच्या आईने त्या पुरुषाला किडनी दान केली होते.२९ मार्च २०२२ रोजी, ट्रान्सप्लांट शस्त्रक्रिया झाल्यानंतर चार दिवसांनी, संबंधित महिलेने पैशांवरून झालेल्या वादानंतर आपली खरी ओळख उघड केली. त्यामुळे रुग्णालयाने पोलिसांना माहिती दिली आणि पोलिसांनी ही घटना आरोग्य विभागाच्या निदर्शनास आणून दिली.
तावरे याची किडनी प्रत्यारोपणात मुख्य भूमिका आहे. तावरे याला किडनी देणारे आणि किडनी घेणारे हे दोघेही बनावट आहेत हे माहिती होते. तावरे यानेच त्यांच्या मुलाखती घेतल्या होत्या. त्यांनी किडनी देताना सादर केलेल्या कागदपत्रांची पडताळणी केली होती. डॉ. तावरे हा तेव्हा रिजनल ऑथरायझेशन कमिटीचे अध्यक्ष असल्याने त्याने बनावट कागदपत्रांना मान्यता दिली असल्याचे नमूद करण्यात आले होते.
