पुणे, ता.०५ : पुण्यात पोलीस शिपायाने महिला पोलिस कर्मचार्याला कोल्ड्रींकमधून गुंगीचे औषध देऊन बलात्कार केल्याची धक्कादायक घटना घडली आहे. आणि अन ‘त्या’ क्षणाचे व्हिडिओ व्हायरल करण्याची धमकी देऊन वारंवार बलात्कार केला. तसेच पिस्तुलाचा धाक दाखवून जीवे ठार मारण्याची धमकी दिल्याचा धक्कादायक प्रकार समोर आला आहे. यामुळे पुणे शहर दलात एकच खळबळ उडाली आहे.
याप्रकरणी एका महिला पोलीस कर्मचार्याने खडक पोलिस ठाण्यात फिर्याद दिली आहे. त्यानुसार पोलिसांनी दीपक सिताराम मोघे या पोलीस शिपायावर गुन्हा दाखल केला आहे. हा प्रकार स्वारगेट पोलीस वसाहत व खडकवासला येथील लॉजवर सन २०२० ते १ ऑगस्ट २०२३ या दरम्यान घडला.
पोलिसांनी दिलेल्या माहितीनुसार, फिर्यादी आणि आरोपी मोघे हे दोघेही शहर पोलीस दलात नेमणूकीला असून स्वारगेट पोलीस वसाहतीत राहतात. आरोपी मोघे हा सध्या मार्केटयार्ड पोलीस ठाण्यात नेमणूकीला आहे. लॉकडाऊनच्या कालावधीत आरोपी दीपक मोघे याने फिर्यादी महिलेशी ओळख वाढविली. व या काळात आरोपी घरी जेवणास तो जात होता.
दरम्यान, आरोपी दीपक मोघे याने कोल्ड्रींकमधून फिर्यादीला गुंगीकारक औषध दिले. त्यामुळे फिर्यादीस उलट्यांचा त्रास होऊ लागला. तेव्हा त्याने फिर्यादीला गोळ्या खाण्यास दिल्या. त्यामुळे आणखी गुंगी येऊन त्यांना झोप लागली. त्यानंतर आरोपीने फिर्यादीसोबत शारीरीक संबंध केले. त्याचा व्हिडिओ तयार केला. हा व्हिडिओ व्हायरल करण्याची धमकी दिली. तसेच फिर्यादीचे पतीला जीवे ठार मारण्याची धमकी दिली.
त्यानंतर आरोपी दीपक मोघे याने वेगवेगळ्या ठिकाणी नेऊन तिच्यावर बलात्कार केला. फिर्यादीला पिस्तुलाचा धाक दाखवून जीवे ठार मारण्याची धमकी दिली. फिर्यादीच्या घरातील कपाटातील ५ ते ६ तोळे वजनाचे सोन्याचे दागिने, लॅपटॉप, डोंगल व मोबाईल अशा सर्व वस्तू जबरदस्तीने घेऊन गेला.
याप्रकरणी खडक पोलीस ठाण्यात गुन्हा दाखल करण्यात आला आहे. पुढील तपास सहायक पोलिस निरीक्षक तोटेवार करीत आहेत.
