Baramati News : बारामती, (पुणे) : बारामती शहर पोलिसांनी अत्यंत धाडसी, शिताफीपूर्ण आणि नियोजनबद्ध कारवाई करत तब्बल १५ गुन्ह्यांमध्ये न्यायालयाने नॉन बेलेबल वॉरंट जारी केलेल्या सराईत फरार आरोपीला अखेर बेड्या ठोकल्या आहेत. अनेक वर्षांपासून न्यायालयीन प्रक्रियेला चकवा देणारा शंकर उर्फ पोक्या प्रकाश आडके (रा. मळद, ता. बारामती) अखेर पोलिसांच्या जाळ्यात अडकला. Baramati News
पोलिसांना मिळालेल्या गोपनीय माहितीच्या आधारे 24 मे रोजी सकाळी पोलिस पथकाने सापळा रचला. पोलिसांची चाहूल लागताच आरोपीने थेट करा नदीच्या उंच भिंतीवरून नदीत उडी घेत पळ काढला. इतक्यावरच न थांबता तो नदीकाठच्या दाट उसाच्या फडात लपला. मात्र पोलिसांनी हार न मानता तब्बल दीड तास परिसरात कसून शोधमोहीम राबवली. Baramati News
शेवटी उसामधील संशयास्पद हालचालींवरून पोलिसांनी संपूर्ण परिसराला घेराव घालत आरोपीला शिताफीने ताब्यात घेतले. अनेक वर्षांपासून पोलिस व न्यायालयाला चकवा देणारा आरोपी अखेर कायद्याच्या कचाट्यात सापडला. या धडाकेबाज कारवाईनंतर न्यायालयाने आरोपीला येरवडा कारागृहात न्यायालयीन कोठडी सुनावली आहे. परिसरात या कारवाईची जोरदार चर्चा सुरू असून नागरिकांकडून बारामती शहर पोलिसांचे कौतुक होत आहे. Baramati News
या मोहिमेत पोलिस हवालदार टापरे, पोलीस शिपाई गिरीश नेवसे, वैभव मदने, महिला पोलीस हवालदार सगुना आवटे, उमा कोकरे यांच्या पथकाने अत्यंत धाडस आणि चिकाटी दाखवली. “गुन्हेगार कितीही चलाख असला तरी कायद्यापासून कायम लपून राहू शकत नाही,” हे बारामती शहर पोलिसांनी पुन्हा एकदा सिद्ध करून दाखवले. Baramati News
सदरची कामगिरी बारामती शहर पोलीस ठाण्याचे प्रभारी पोलीस निरीक्षक श्रीशैल चिवडशेट्टी यांच्या मार्गदर्शनाखाली पोलिस हवालदार उदय टापरे, पोलीस शिपाई गिरीश नेवसे, पोलीस शिपाई वैभव मदने, महिला पोलीस हवालदार सगुना आवटे, पोलीस हवालदार उमा कोकरे व बारामती शहर पोलीस स्टेशनच्या पथकाने केली आहे. Baramati News
