वाघोली : वाघोली येथील मोक्याच्या ठिकाणी असलेल्या जमिनीच्या मालकिणीची बनावट सही, खोटे ना-हरकत प्रमाणपत्र व बोगस प्रतिज्ञापत्र तयार करून, खाजगी कंपनीला केबल टाकण्याची परवानगी देत लाखो रुपयांची फसवणूक केल्याचा धक्कादायक प्रकार उघडकीस आला आहे. या प्रकरणी न्यायालयाच्या आदेशानंतर वाघोली पोलिसांनी भारती एअरटेल लिमिटेड कंपनीसह 6 जणांविरोधात गंभीर कलमांखाली गुन्हा दाखल केला आहे.
अजित सुरेश सातव (वय 33, रा. वाघोली), सातव लँडमार्कस (प्रो. प्रा. अजित सुरेश सातव), संतोष निवृत्ती तांबे (वय 35, रा. बायफ रोड, वाघोली), सागर जाधव (वय -36, रा. संत तुकाराम नगर, वाघोली) विकास पोखरणा (वय-38, एअरटेल कर्मचारी, रा. खराडी, पुणे) व भारती एअरटेल लिमिटेड (खराडी, पुणे व गुडगाव, हरियाणा शाखा) असे गुन्हा दाखल करण्यात आलेल्यांची नावे आहेत. याबाबत निर्मलादेवी प्रतापराव सातव (वय -81, रा. गणेशखिंड रोड, शिवाजीनगर) यांनी वाघोली पोलीस ठाण्यात फिर्याद दिली आहे. त्यानुसार पोलिसांनी वरील सहा जणांवर गुन्हा दाखल केला आहे.
पोलिसांनी दिलेल्या माहितीनुसार, निर्मलादेवी सातव यांची वाघोली (ता. हवेली) येथील गट क्र. 569 आणि 570 मध्ये मालकी हक्काची जमीन असून, त्यांनी भावडी रोड ते अहिल्यानगर हायवेपर्यंत स्वखर्चाने सिमेंट रस्ता बनवला आहे. 2018 मध्ये या जागेवर बांधकाम सुरू असताना, आरोपी अजित सुरेश सातव याने फिर्यादींच्या ‘सातव’ या आडनावाशी साधर्म्य असल्याचा गैरफायदा घेतला. स्वतःला निर्मलादेवी यांचा पुतण्या भासवून, त्याने 1नोव्हेंबर 2018 रोजी निर्मलादेवी यांची बनावट सही असलेले खोटे सहमती पत्र आणि 100 रुपयांच्या स्टॅम्प पेपरवर खोटे प्रतिज्ञापत्र तयार केले.
या बनावट कागदपत्रांच्या आधारे, निर्मलादेवी यांच्या मालकीच्या जमिनीतून तब्बल 2हजार 275 मीटर ऑप्टिक फायबर केबल टाकण्यासाठी भारती एअरटेल कंपनीला बेकायदेशीर परवानगी दिली. आरोपी अजित सातव याने फिर्यादींच्या मूळ फर्मसारखे नाव वापरून ‘सातव लँडमार्कस’ नावाने आय.डी.बी.आय. बँक, वाघोली शाखेत बोगस खाते उघडले. भारती एअरटेल कंपनीने जमिनीच्या मूळ मालकी हक्काची कोणतीही खातरजमा न करता, आरोपींच्या संगनमताने 19 नोव्हेंबर 2018 रोजी या खात्यात 17 लाख 06 हजार 250 रुपयांचा डिमांड ड्राफ्ट भरला व 1 लाख 89 हजार 583 रुपयांच्या TDS चा अपहार केला.
फिर्यादी निर्मलादेवी सातव यांना या बेकायदेशीर कृत्याची माहिती जुलै 2023 मध्ये मिळाल्यानंतर, त्यांनी वकिलांमार्फत एअरटेल कंपनीला नोटिसा पाठवल्या. कंपनीने जानेवारी 2024 मध्ये पाठवलेल्या उत्तरावरून आरोपींनी केलेल्या महाघोटाळ्याची पोलखोल झाली. या संपूर्ण प्रकारातून आपली तब्बल 42 लाख रुपयांची आर्थिक फसवणूक झाल्याचे फिर्यादीत नमूद केले आहे.
दरम्यान, प्रथमवर्ग न्यायादंडाधिकारी (न्यायालय क्र. 06, पुणे) यांनी या प्रकरणाची गंभीर दखल घेत भारतीय नागरिक सुरक्षा संहिता 2023 च्या कलम 175 (3) अन्वये वाघोली पोलिसांना तात्काळ गुन्हे दाखल करण्याचे आदेश दिले. त्यावरून वाघोली पोलिसांनी वरील आरोपींवर गुन्हे दाखल केले आहे. पुढील सखोल तपास वाघोली पोलीस करत आहेत.
