पुणे: खेड तालुक्यातील वाकी बुद्रुक परिसरात घडलेल्या एका दुर्दैवी घटनेने पुन्हा एकदा समाजाला विचार करायला भाग पाडले आहे. एकाच वर्गात शिक्षण घेणाऱ्या 19 वर्षीय तरुणीने प्रेमसंबंधातील फसवणूक, नकार आणि मानसिक तणावामुळे शेवटी जीव घेण्याचा टोकाचा निर्णय घेतला. चार दिवस मृत्यूशी झुंज दिल्यानंतर अखेर रविवारी तिचा मृत्यू झाला. या प्रकरणी चाकण पोलिसांनी संबंधित तरुणाविरुद्ध गुन्हा दाखल केला आहे.
पोलिसांनी दिलेल्या माहितीनुसार, पीडित तरुणी व आरोपी प्रज्वल विश्वास राळे (वय 19, रा. राक्षेवाडी, ता. खेड, मुळगाव कोथे, ता. खेड) हे दोघे एकाच वर्गात शिक्षण घेत होते. एकमेकांवर प्रेम असल्याने दोघेही एकत्र फिरणे, बोलणे, संपर्कात राहणे सुरू होते. मात्र काही दिवसांपूर्वी प्रज्वल राळे याचे दुसऱ्या तरुणीशी प्रेमसंबंध जुळले. त्यानंतर त्याने आधीच्या तरुणीला लग्नास नकार दिला. फक्त नकारच नव्हे, तर “तुझे दुसऱ्या मुलासोबत अफेअर आहे” असा गंभीर आरोपही त्याने तिच्यावर केला. या धक्क्याने व मानसिक त्रासाने पीडित तरुणी पूर्णपणे खचली. तिच्या मनावर खोल परिणाम झाला.
या मानसिक धक्क्याने त्रस्त झालेल्या तरुणीने 28 ऑगस्ट रोजी सकाळी साधारण 9.30 च्या सुमारास शेतातील घरामागे जाऊन पिकावर मारण्यासाठी आणलेले विडॉफ हे विषारी औषध पिऊन आत्महत्येचा प्रयत्न केला. ही घटना लक्षात येताच नातेवाईकांनी तिला तातडीने जवळच्या खासगी रुग्णालयात दाखल केले. चार दिवस तिच्यावर उपचार सुरू होते. मात्र प्रकृती गंभीर असल्याने रविवारी अखेर तिचा मृत्यू झाला. या घटनेमुळे संपूर्ण परिसरात हळहळ व्यक्त होत आहे.
तरुणीच्या आईने या प्रकरणी थेट आरोपीवर जबाबदारी टाकली असून, चाकण पोलिसांकडे फिर्याद नोंदवली आहे. त्यानुसार प्रज्वल विश्वास राळे याच्यावर आत्महत्येस प्रवृत्त केल्याचा गुन्हा दाखल करण्यात आला आहे. पुढील तपास सहायक पोलीस निरीक्षक आर. बी. पवार करीत आहेत.
