लोणी काळभोर, (पुणे) : पुणे-सोलापूर महामार्गावरील सोरतापवाडी (ता. हवेली) ग्रामपंचायत हद्दीत अज्ञात वाहनाने दिलेल्या धडकेत दुचाकीवरील महिलेचा जागेवरच मृत्यु झाल्याची घटना गुरुवारी (ता. २१) दुपारी साडेबारा वाजण्याच्या सुमारास घडली आहे.
लक्ष्मी वाल्मिक देवकुळे (वय-४६, रा. गोडबोले वस्ती, मोमीन नगर, मांजरी, ता. हवेली) असे अपघातात मृत्यू झालेल्या महिलेचे नाव आहे.
लोणी काळभोर पोलिसांनी दिलेल्या माहितीनुसार, गुरुवारी सकाळी आकरा वाजण्याच्या सुमारास वाल्मिक देवकुळे व त्यांची पत्नी लक्ष्मी देवकुळे हे मांजरी येथून पुणे-सोलापूर महामार्गाने यवत या ठिकाणी दुचाकीवरून निघाले होते. यावेळी साडे बारा वाजण्याच्या सुमारास सोरतापवाडी ग्रामपंचायत हद्दीतील श्रेयश पोल्ट्री चिकन दुकानासमोर त्यांच्या दुचाकीला अज्ञात वाहनाने जोरदार धडक दिली.
या अपघातात वाल्मिक देवकुळे व त्यांची पत्नी लक्ष्मी देवकुळे हे दोघेही रस्त्यावर पडले. यावेळी लक्ष्मी देवकुळे यांच्या डोक्याला गंभीर दुखापत झाली होती. त्यांना उपचारासाठी ससून रुग्णालयात दाखल केले असता डॉक्टरांनी त्यांना उपचारापूर्वीच मयत झाल्याचे सांगितले. तपास लोणी काळभोर पोलीस ठाण्याचे पोलीस उपनिरीक्षक किरण धायगुडे करीत आहेत.
