पनवेल : दोन मेहुण्यांना कारने पाठीमागून धडक देऊन जीवे मारण्याचा प्रयत्न केल्याची धक्कादायक घटना तळोजा (नवीन पनवेल) परिसरात नुकतीच उघडकीस आली आहे. या धडकेत दोन्ही सख्खे भाऊ गंभीर जखमी झाले असून त्यांच्यावर खाजगी दवाखान्यात उपचार सुरु आहेत. याप्रकरणी दाजीच्या विरोधात तळोजा पोलिस ठाण्यात गुन्हा दाखल करण्यात आला आहे.
फैझल नाझीम अंसारी (वय-२६) असे गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, फैझल नाझीम अंसारी आणि शहरीन अन्सारी यांचा २०२२ मध्ये विवाह झाला होता. लग्नानंतर त्या दोघांमध्ये वारंवार किरकोळ कारणावरून वादविवाद होत होते. या वादविवादात नाझीमने शहरीनला मारहाण सुद्धा केली आहे. त्यांमुळे शहरीनचा लहान भाऊ शहानवाज अब्दुल मलिक अन्सारी (वय-१९) याने शहरीनला घरी घेऊन आला होता. व आरोपी नाझीम याच्याविरोधात तळोजा पोलिस ठाण्यात अदाखलपत्र गुन्हा दाखल केला.
दरम्यान, दोन दिवसापूर्वी शहनवाज आणि भाऊ मोहम्मद हे नमाजवरून घरी जात असताना, त्या दोघांना एका कारने भरधाव वेगाने पाठीमागून धडक दिली. यावेळी त्यांनी गाडीचा क्रमांक पाहिला असता, तो दाजी फैझल यांची असल्याचे दिसले. त्यानंतर आरोपी फैझल गाडी घेऊन तेथून पसार झाला. गाडीने पाठीमागून धडक दिल्याने शहानवाज आणि त्यांचा भाऊ मोहम्मद हे दोघे जखमी झाले आहेत.
