धुळे : पोलीस निरीक्षक प्रवीण विश्वनाथ कदम यांनी थेट पोलीस प्रशिक्षण केंद्रातच गळफास घेऊन आत्महत्या केल्याची धक्कादायक घटना धुळे येथे नुकतीच घडल्याचे समोर आले आहे.
पोलिसांनी दिलेल्या माहितीनुसार, प्रवीण कदम हे पुणे येथून २०१९ मध्ये पोलीस प्रशिक्षण केंद्रात आले होते. धुळे येथील पोलीस प्रशिक्षण केंद्रात २०१९ पासून ते कर्त्यव्य बजावीत होते. मात्र काल सायंकाळी त्यांच्या निवासस्थानाचा दरवाजा बंद होता.
त्यामुळे त्यांच्या काही सहकाऱ्यांनी दरवाजा ठोठावला असता आतून कसलाही प्रतिसाद मिळाला नाही.
त्यानंतर सहकाऱ्यांनी मिळून दरवाजा तोडला, घरात जाऊन पहिले असता कदम हे गळफास घेतलेल्या अवस्थेत आढळून आले. याप्रकरणी प्रवीण कदम यांच्या सहकाऱ्यांनी ही बाब तातडीने धुळे पोलिसांना माहिती दिली.
या घटनेची माहिती मिळताच शहर पोलीस ठाण्याचे पोलीस निरीक्षक नितीन देशमुख व त्यांचे सहकारी तातडीने घटनास्थळी दाखल झाले. पोलिसांनी मयत कदम यांच्या खोलीची तपासणी केली असता, कदम यांनी आत्महत्या करण्यापूर्वी लिहिलेली चिठ्ठी आढळून आली.
या चिठ्ठीमध्ये आपल्या मृत्यूस कोणासही कारणीभूत धरू नये. असे कदम यांनी लिहिले असल्याची माहिती पोलिसांनी दिली आहे. शहर पोलीस ठाण्यात आकस्मित मृत्यूची नोंद करण्यात आली आहे.
पुढील तपास धुळे शहर पोलीस करीत आहेत.
