पुणे : पुण्यातील कोथरुडमधल्या आशिष गार्डन जवळील श्रावणधारा इमारतीतील सातव्या आणि आठव्या मजल्यावर आग लागल्याची घटना घडली आहे. सिलिंडरच्या स्फोटामुळे आग लागल्याची शक्यता वर्तवली जात आहे.
ही आग गुरुवारी (ता. १७) सकाळी लागली असून अग्निशामक दलाच्या आठ गाड्या घटनास्थळी दाखल झाल्या आहेत. आग विझवण्याचे शर्थीचे प्रयत्न सुरु आहेत.
या घटनेची माहिती मिळताच अग्निशामक दलाचे जवान काही मिनिटात घटनास्थळी दाखल झाले असून, सोसायटीमधील आठव्या मजल्यावरील आगीच्या ठिकाणी चार ही बाजूने पाण्याचा मारा करण्यास सुरुवात केली आहे. आग लागलेल्या इमारतीमधील आठ ते दहा जणांना सुखरूप बाहेर काढण्यात यश आले आहे. तसेच या आगीवर नियंत्रण मिळविण्याचे काम सुरू असून ही आग कशामुळे लागली आहे, याची माहिती अजूनही मिळालेली नाहीये.
