पुणे : पुणे -मुंबई महामार्गावरील कासारवाडी येथील भंगार टायरच्या दुकानाला मंगळवारी (ता. ३१) पहाटे दोनच्या सुमारास भीषण आग लागली. या ठिकाणापासून मॅक्स न्युरो हॉस्पिटल जवळच असल्याने तेथील १९ रुग्णांना महापालिकेच्या वायसीएमसह अन्य रुग्णालयात स्थलांतरित करण्यात आले आहे.
मिळालेल्या माहिती नुसार, महामार्गालगत पुण्याकडे जाणाऱ्या मार्गावर जय गणेश टायर नावाचे दुकान आहे. सर्व वाहनांचे जुने टायर दुकानासह आवारात होते. मंगळवारी (ता.३१) पहाटे दोनच्या सुमारास त्यांना आग लागली. आगीच्या ज्वाला उंच होत्या. धुरही खूप होता.
घटना घडली तेव्हा शेजारील मॅक्स न्युरो हॉस्पिटलमधील रुग्ण झोपेत होते. हॉस्पिटलचे संचालक डॉ. उमेश फालके यांच्या निगराणीखाली रुग्णांना स्थलांतरित केले.
१२ रुग्णांना वायसीएममध्ये, तीन रुग्णांना खासगी रुग्णालयात व चार रुग्णांना घरी पाठवण्यात आले .अग्निशमन दलाच्या १४ बंबांच्या सहाय्याने आग आटोक्यात आणली.
