रांजणगाव गणपती : पुणे – अहमदनगर रस्त्यावर रांजणगाव गणपती (ता. शिरूर) ग्रामपंचायत हद्दीत अज्ञात वाहनाने दिलेल्या धडकेत एका बिबट्याचा मृत्यू झाल्याची घटना नुकतीच उघडकीस आली आहे. हि घटना रविवारी (ता. १२) पहाटे साडेपाच वाजण्याच्या सुमारास घडली आहे.
मिळालेल्या माहितीनुसार, रांजणगाव गणपती परिसरात मागील काही दिवसापासून बिबट्या धुमाकूळ घालीत असल्याची तक्रार रांजणगाव गणपती, करंजावणे, खंडाळे, बाभुळसर खुर्द परिसरातील नागरिकांनी वन विभागाकडे केली होती. या परिसरातील बिबट्याच्या बंदोबस्तासाठी परिसरात पिंजरे लावण्याची मागणीही स्थानिक ग्रामस्थ व ग्रामपंचायतीकडून करण्यात आली होती. रविवारी सकाळी रांजणगावजवळ हॉटेल राजयोग जवळ बिबट्या मृतावस्थेत आढळला.
रांजणगाव एमआयडीसीतील कंपनीत रात्रपाळीला कामाला असलेल्या कामगारांनी कामावरून घरी जाताना हा मृत बिबट्या पाहिला व याबाबत वनखात्याला माहिती दिली. वनरक्षक सविता चव्हाण यांनी रेस्क्यू मेंबर हनुमंत कारकूड व आनंदा शेवाळे यांच्यासह तातडीने घटनास्थळी भेट दिली.
दरम्यान, तोंडाला व डोक्याला मार लागल्याने रक्तस्त्राव होऊन बिबट्याचा मृत्यु झाला होता. रेस्क्यू पथकाने स्थानिकांच्या मदतीने या बिबट्याला शिरूरच्या वनपरिक्षेत्र कार्यालयात आणले. तेथे शवविच्छेदन करून बिबट्यावर अंत्यसंस्कार करण्यात आले.
