नागपूर : नागपूर येथील सक्करदरा परिसरात चारचाकी व दुचाकीत झालेल्या अपघातात दुचाकीवरील एकाच कुटुंबातील चौघांचा मृत्यू झाल्याची घटना वारी (ता.०९) रात्री १० वाजण्याच्या सुमारास हि घटना घडली आहे. मृतांमध्ये दोन लहान चिमुकल्यांचा समावेश आहे.
मिळालेल्या माहितीनुसार, नागपूर शहरातील सक्करदरा पुलावर आरोपी कार चालकाने विरुद्ध दिशेने कार भरधाव वेगाने पळवण्याचा प्रयत्न केला. कारने एकापाठोपाठ तीन गाड्यांना जबर धकड दिली. त्यात एका दुचाकीवर एक इसम त्यांचे दोन मुलं आणि त्या इसमाची आई जात होती. त्या दुचाकीला कारने जोरदार धडक दिली. ही धडक इतकी जोरात होती की, हे चौघेही ७० ते ८० फूट पुलावरुन खाली फेकले गेले. या अपघातात चौघांचाही मृत्यू झाला आहे.
दरम्यान, चारचाकी चालकाचे वाहनावरील नियंत्रण सुटल्याने हा अपघात झाला असावा असा अंदाज पोलिसांनी वर्तवला आहे. तसेच अपघात झाला त्यावेळी चारचाकी चालक दारु पिऊन गाडी चालवत असल्याची माहिती देखील समोर येत आहे. या अपघातामध्ये दोन जणांचा जागीच मृत्यू झाला तर दोन गंभीर जखमी झाले आहेत. वाहनाचे देखील मोठ्या प्रमाणात नुकसान झाले आहे. चारचाकी वाहनाच्या चालकाला ताब्यात घेतलं आहे. ताब्यात घेण्यात आलेला व्यक्ती कार मालकाचा ड्रायव्हर असल्याची माहिती मिळाली आहे.
