हडपसर : हडपसर येथील मेगा सेंटरमधील सहायक दुय्यम निबंधक कार्यालयात बनावट गुंठेवारी, बनावट NA चा परवाना जोडून विक्री करणाऱ्या १९ जणांवर हडपसर पोलीस ठाण्यात वेगवेगळ्या प्रकारचे ७ गुन्हे दाखल करण्यात आले आहेत. हा प्रकार २९ डिसेबर २०२१ ते ७ जानेवारी २०२२ दरम्यान घडला होता.
नंदा नामदेव निंबाळकर, अमोल नामदेव निंबाळकर, अजित नामदेव निंबाळकर, सोनाली अतुल निंबाळकर व महेश ओमप्रकाश धुत (रा. लेकटाऊन सोसायटी, कात्रज ) व त्यांना बेकायदेशीर कामासाठी मदत करणारे इतरांवर गुन्हा दाखल करण्यात आला आहे. तसेच सिद्धनाथ डेव्हलपर्सतर्फे जहाँगीर हुसेन हमजुद्दीन मुल्ला (रा. आंबेगाव बु़), श्री साई स्वराज डेव्हलपर्सतर्फे भागीदार पोपट बबन पायगुडे (रा. कात्रज), हेमचंद सोमनाथ भाटी (रा. कात्रज) समीर गोविंद कडु (रा. सुखसागरनगर, कात्रज) व त्यांना मदत करणारे, सातव पाटील एंटरप्रायसेस तर्फ प्रो. प्रा. निखील किसन सातव (रा. वाघोली) व त्यांना मदत करणारे यांच्यावर वेगवेगळ्या प्रकारचे ७ गुन्हे दाखल करण्यात आला आहे. याप्रकरणी विष्णु तुकाराम आम्ले (रा. फुरसुंगी. ता. हवेली) यांनी हडपसर पोलीस तक्रार ठाण्यात दिली आहे.
हडपसर पोलीस ठाण्याचे वरिष्ठ पोलीस निरीक्षक अरविंद गोकुळे यांनी दिलेल्या माहितीनुसार, आम्ले हे हडपसर येथील मेगा सेंटरमध्ये असलेल्या सहायक दुय्यम निबंधक वर्ग २ च्या कार्यालयात लिपिक म्हणून काम करतात. या कार्यालयात दस्त लिहून देणार व त्यांना बेकायदेशीर कामासाठी मदत करणारे इतरांनी स्वत:च्या फायद्याकरीता दस्तास बनावट नियमितीकरण दाखले जोडले आहेत. आणि त्याची नोंदणी करुन सहायक दुय्यम निबंधक व पुणे महापालिकेचे उप अभियंता बांधकाम विकास विभाग यांची फसवणूक केली. याप्रकरणी आम्ले यांनी हडपसर पोलीस ठाण्यात तक्रार दिली.
दरम्यान, हडपसर येथील मेगा सेंटरमधील सहायक दुय्यम निबंधक कार्यालयात दस्त नोंदणी करताना एजंटांमार्फत बनावट कागदपत्रे सादर करुन दस्त नोंदणी करणारे आता अडचणीत आले आहेत. बनावट गुंठेवारी, बनावट एन ए ऑर्डर जोडणार्या १९ जणांवर ७ गुन्हे दाखल करण्यात आले आहेत. त्यामुळे एजंटाद्वारे काम करुन घेणार्यांनी शासनाबरोबर पिंपरी व पुणे महापालिकेच्या बांधकाम विभागाची फसवणुक केल्याचा गुन्हा दाखल करण्यात आला आहे.
