पुणे: पुणे आणि परिसरात (Pune Weather) गेल्या काही दिवसांपासून जाणवणारा कडाक्याचा गारठा आता काहीसा ओसरू लागला आहे. भारतीय हवामान विभागाने (IMD) दिलेल्या माहितीनुसार, आज मंगळवारी पुण्यातील किमान तापमानात किंचित वाढ झाली असून, नागरिकांना गुलाबी थंडीचा अनुभव येत आहे. किमान तापमान साधारणपणे १२°C ते १५°C च्या दरम्यान नोंदवण्यात आले असून, पहाटेच्या वेळी हवेत सुखद गारवा जाणवत आहे.
दुसरीकडे, दिवसाच्या कमाल तापमानात वाढ झाल्याने दुपारच्या वेळी पुणेकरांना उन्हाचा चटका जाणवण्याची दाट शक्यता आहे. आज आकाश पूर्णपणे निरभ्र राहणार असून कमाल तापमान २९°C ते ३२°C पर्यंत जाण्याचा अंदाज आहे. त्यामुळे सकाळी हुडहुडी आणि दुपारी उन्हाचा तडाखा असे दुहेरी वातावरण आज शहरात पाहायला मिळेल. पावसाची कोणतीही शक्यता नसल्याने हवामान कोरडे राहील.
शहरातील हवेच्या गुणवत्तेबाबत (AQI) बोलायचे झाले तर, आज पुण्याचा सरासरी निर्देशांक १५० ते १७० च्या दरम्यान राहण्याची शक्यता आहे. वातावरणातील बदलांमुळे आणि वाहनांच्या धुरामुळे हवेतील धूलिकणांचे प्रमाण वाढले आहे. विशेषतः शिवाजीनगर आणि हडपसर सारख्या भागात हवेचे प्रदूषण जास्त जाणवू शकते, त्यामुळे श्वसनाचा त्रास असलेल्या नागरिकांनी सकाळी घराबाहेर पडताना मास्कचा वापर करण्याचे आवाहन करण्यात आले आहे.
येत्या ७ दिवसांच्या अंदाजानुसार, २३ जानेवारीपर्यंत तापमानात चढ-उतार पाहायला मिळेल. मात्र, त्यानंतर उत्तर भारताकडून येणाऱ्या थंड वाऱ्यांचा प्रभाव पुन्हा वाढण्याची शक्यता असून जानेवारीच्या शेवटच्या आठवड्यात थंडीचा कडाका वाढू शकतो.
