सोलापूर: सोलापूर जिल्ह्यातील माढा तालुक्यातील जाधववाडी परिसरात एक अत्यंत धक्कादायक आणि संतापजनक घटना घडली आहे. कौटुंबिक वादातून एका सख्ख्या भावाने आणि त्याच्या मुलाने मिळून भाऊ महादेव जाधव यांच्यावर प्राणघातक हल्ला केला. या क्रूर हल्ल्यात महादेव जाधव गंभीर जखमी झाले असून, त्यांची प्रकृती चिंताजनक असल्याचे समजते.
मिळालेल्या माहितीनुसार, महादेव जाधव आणि त्यांचा सख्खा भाऊ यांच्यात गेल्या अनेक दिवसांपासून काही कारणांवरून वाद सुरू होते. याच वादाचा राग मनात धरून, आरोपी भाऊ आणि त्याच्या मुलाने मिळून महादेव जाधव यांच्यावर लोखंडी रॉड आणि धारदार कोयत्याने अचानक हल्ला चढवला. हा हल्ला इतका भीषण होता की, आरोपींनी महादेव यांच्या डोक्यावर तब्बल 7 ते 8 वार केले.
रक्ताच्या थारोळ्यात कोसळलेल्या महादेव जाधव यांना परिसरातील नागरिकांनी तातडीने करकंब येथील जगताप सुपर स्पेशालिटी हॉस्पिटलमध्ये दाखल केले. सध्या ते आयसीयूमध्ये असून, डॉक्टरांचे एक विशेष पथक त्यांच्या प्रकृतीवर लक्ष ठेवून आहे.
घटनेची माहिती मिळताच टेंभुर्णी पोलिसांनी तातडीने घटनास्थळी धाव घेत पंचनामा असून या प्रकरणी गुन्हा दाखल करण्याची प्रक्रिया सुरू आहे. दरम्यान, हल्ल्यानंतर फरार झालेल्या आरोपींचा शोध घेण्यासाठी पोलीस पथके रवाना झाली आहेत.
