सांगली: सांगली जिल्हा मध्यवर्ती सहकारी बँकेच्या 6 जागांसाठी झालेल्या निवडणुकीची मतमोजणी पार पडली असून, निकालात अनेक राजकीय नेत्यांची प्रतिष्ठा पणाला लागल्याचे पाहायला मिळाले. या निवडणुकीत माजी खासदार संजयकाका पाटील, भाजप आमदार गोपीचंद पडळकर, माजी आमदार सुमनताई पाटील आणि माजी मंत्री अजितराव घोरपडे यांच्यासाठी ही लढत महत्त्वाची मानली जात होती. मतमोजणीदरम्यान तासगाव आणि जत गटातील निकालांनी विशेष लक्ष वेधले.
तासगाव सोसायटी गटात माजी खासदार संजयकाका पाटील यांनी अवघ्या एका मताने विजय मिळवला. त्यांनी राष्ट्रवादी काँग्रेसच्या शरदचंद्र पवार गटाच्या माजी आमदार सुमनताई आर. आर. पाटील यांचा पराभव केला. या लढतीत संजयकाका पाटील यांना 39 मते मिळाली, तर सुमनताई पाटील यांना 38 मते मिळाली. त्यामुळे केवळ एका मताच्या फरकाने निकाल लागला. हा पराभव आमदार रोहित पाटील यांच्यासाठी राजकीयदृष्ट्या महत्त्वाचा धक्का मानला जात आहे.
दुसरीकडे, जत सोसायटी गटातून भाजप आमदार गोपीचंद पडळकर यांनी विजय मिळवला. त्यांनी महाविकास आघाडीचे उमेदवार विनोद पवार यांचा 20 मतांनी पराभव केला. पडळकर यांना 54 मते मिळाली, तर विनोद पवार यांना 34 मते मिळाली. या विजयामुळे जिल्हा बँकेच्या राजकारणात पडळकर यांची उपस्थिती महत्त्वाची ठरणार आहे.
निकाल जाहीर झाल्यानंतर मतमोजणी केंद्राबाहेर समर्थकांनी मोठा जल्लोष केला. संजयकाका पाटील आणि गोपीचंद पडळकर यांच्या समर्थकांनी गुलाल उधळत, फटाके फोडत आणि घोषणाबाजी करत विजयाचा आनंद साजरा केला. अवघ्या एका मताने लागलेला तासगावचा निकाल आणि जत गटातील पडळकरांचा विजय यामुळे सांगली जिल्हा बँकेची निवडणूक चर्चेत आली आहे.
