मांजरी, ता.3 : मांजरी बुद्रुक (ता. हवेली) येथील विजयविहार कॉलनी परिसरातून तब्बल 8 लाख 50 हजार रुपये किमतीचा पाण्याचा टँकर चोरीला गेल्याची घटना उघडकीस आली आहे. चोरट्यांनी मध्यरात्रीच्या सुमारास पार्क केलेला टँकर पळवून नेल्यानंतर त्याचे जीपीएस कनेक्शनही बंद केल्याचे समोर आले आहे. या घटनेमुळे परिसरात खळबळ उडाली असून मांजरी पोलिसांकडून अज्ञात चोरट्यांचा शोध सुरू आहे.
याप्रकरणी टँकरमालक नितीन यशवंतराव शिवरकर (वय 64, रा. रास्ता पेठ, पुणे) यांनी मांजरी पोलीस ठाण्यात फिर्याद दिली आहे. त्यानुसार अज्ञात चोरट्याच्या विरोधात भारतीय न्याय संहिता (बी एन एस), 2023 – 303(2) प्रमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, शिवरकर यांचा पुणे महानगरपालिकेला पाण्याचे टँकर पुरवण्याचा व्यवसाय आहे. त्यांचा टाटा कंपनीचा 10 हजार लिटर क्षमतेचा टँकर (क्रमांक एमएच 03 सीपी 4271) मांजरी येथील चालक प्रसाद भालगे याच्याकडे होता. भालगे याने 30 ऑक्टोबर रोजी रात्री साडेआठच्या सुमारास विजयविहार कॉलनी, घुले कॉलनी लेन क्रमांक 1, वरद हॉस्पिटलसमोरील मोकळ्या जागेत टँकर पार्क केला होता.
दरम्यान, 31 ऑक्टोबर रोजी सकाळी साडेसात वाजता चालक कामावर जाण्यासाठी आला असता, पार्क केलेल्या जागेवर टँकर दिसून आला नाही. त्यानंतर टँकरमालकाने GPS लोकेशन तपासले असता, पहाटे 3 वाजून 22 मिनिटांनी टँकर त्या जागेवरून निघाल्याची नोंद आढळली. विशेष म्हणजे, पहाटे 4 वाजून 2 मिनिटांनी जीपीएस GPS कनेक्शन बंद झाल्याचेही निदर्शनास आले.
टँकरचा परिसरात शोध घेऊनही तो मिळून न आल्याने अखेर मालकाने मांजरी पोलीस ठाण्यात धाव घेत तक्रार दाखल केली. याप्रकरणी अज्ञात चोरट्यांविरोधात गुन्हा दाखल करण्याची प्रक्रिया करण्यात आली असून पुढील तपास सुरु आहे.
