सोलापूर: माणुसकीला काळिमा फासणारी एक धक्कादायक घटना सोलापूरच्या मोहोळ तालुक्यातील सारोळे गावातून समोर आली आहे. अवघ्या चार महिन्यांपूर्वी सुखी संसाराची स्वप्ने घेऊन सासरी आलेल्या 22 वर्षीय विवाहितेची हुंड्यासाठी सासरच्या मंडळींनी गळा दाबून हत्या केली. पैशाचा हव्यास आणि सोन्याच्या अंगठीचा हट्ट सोनाली प्रतीक शिंदेच्या जीवावर बेतला असून, या घटनेने संपूर्ण जिल्हा हादरला आहे.
सोनालीचा विवाह चार महिन्यांपूर्वी प्रतीक शिंदे याच्याशी झाला होता. “लग्नात टीव्ही दिला नाही”, “मुलाला सोन्याची अंगठी दिली नाही” अशा कारणावरून पती प्रतीक आणि सासू भामाबाई उर्फ वंदना शिंदे यांनी तिचा छळ सुरू केला होता. सोनालीच्या गरीब वडिलांनी परिस्थिती नसतानाही 20 हजार रुपये देऊन समजूत काढण्याचा प्रयत्न केला, पण सासरच्यांची भूक मिटली नाही.
12 एप्रिल रोजी पहाटे पती प्रतीकने सोनालीच्या वडिलांना फोन करून “सोनाली उठत नाहीये” असा बनाव रचला. मात्र सोनालीच्या वडिलांना दाट संशय आला. त्यांनी तातडीने पोलिसांना पाचारण केले. प्राथमिक तपास आणि वैद्यकीय अहवालानंतर सोनालीची गळा दाबून हत्या झाल्याचे स्पष्ट झाले.
सध्या मोहोळ पोलिसांनी पती आणि सासूवर खुनाचा गुन्हा दाखल केला असून पुढील तपास सुरू आहे. एका गरीब पित्याने आपल्या लाडक्या लेकीला मोठ्या आशेने सासरी धाडले होते, पण हुंड्याच्या राक्षसाने तिचा बळी घेतला.
