सोलापूर: बार्शी तालुक्यातील वैराग परिसरातून वृद्ध आई- वडिलांना मारहाण केल्याची घटना समोर आली आहे. मुलांच्या नावावर जमीन करून दिल्यानंतरही पाण्याच्या वापरावरून वृद्ध दांपत्याला त्रास सहन करावा लागत असल्याचा आरोप आहे. या घटनेचा व्हिडिओ सोशल मीडियावर व्हायरल झाल्याने प्रकरण चर्चेत आले आहे.
मिळालेल्या माहितीनुसार, 87 वर्षीय बबन यादव पांढरमिशे यांच्याकडे पूर्वी 9 एकर जमीन होती. 2021 मध्ये त्यांनी आपल्या मुलांना प्रत्येकी 3 एकर जमीन बक्षीसपत्राद्वारे दिल्याचे सांगितले जाते. त्यावेळी मोठा मुलगा आई-वडिलांची काळजी घेत असल्याने विहिरीबाबतची नोंद त्याच्या वाट्याच्या जमिनीत करण्यात आली नसल्याची माहिती आहे.
मात्र काही काळानंतर मोठ्या मुलाने वृद्ध आई-वडिलांचा सांभाळ करणे बंद केल्याचा आरोप दांपत्याने केला आहे. त्यानंतर त्यांनी दिलेली जमीन परत मिळावी यासाठी प्रांताधिकाऱ्यांकडे अर्ज केला असून या प्रकरणाची सुनावणी सुरू असल्याचे सांगितले जाते.
दरम्यान, काही दिवसांपूर्वी बबन यादव विहिरीवरील पाण्यासाठी मोटार सुरू करण्यासाठी गेले होते. त्यावेळी त्यांचा मोठा मुलगा राजेंद्र बबन यादव पांढरमिशे याने पाण्याचा वापर करण्यास विरोध करत शिवीगाळ आणि मारहाण केल्याचा आरोप करण्यात आला आहे. या घटनेचा कथित व्हिडिओ सोशल मीडियावर समोर आला आहे.
तक्रारीसाठी वृद्ध दांपत्य वैराग पोलीस ठाण्यात गेले होते. मात्र जमीनविषयक प्रकरण न्यायालयीन प्रक्रियेत असल्याचे सांगून गुन्हा दाखल करण्यास टाळाटाळ झाल्याचा आरोप त्यांनी केला. त्यानंतर दांपत्याने पालकमंत्री जयकुमार गोरे यांची भेट घेऊन आपली बाजू मांडली. आता पोलिसांकडून या प्रकरणात पुढील कायदेशीर कारवाई काय केली जाते, याकडे लक्ष लागले आहे.
