नाशिक : महाराष्ट्रातील नाशिक जिल्ह्यातल्या त्र्यंबकेश्वरमध्ये, (Trimbakeshwar) काही पत्रकारांना स्थानिक गुंडांनी मारहाण केल्याची धक्कादायक घटना घडली आहे. हे पत्रकार आगामी कुंभमेळ्याच्या संदर्भात साधू-महंतांच्या बैठकीचे वार्तांकन करण्यासाठी गेले होते.
या घटनेनंतर, पोलिसांनी तात्काळ कारवाई करत मारहाण करणाऱ्या गुंडांना अटक केली आहे. त्यांच्यावर पत्रकार संरक्षण कायद्यानुसार आणि जीवे मारण्याचा प्रयत्न तसेच दंगल घडवण्याचा प्रयत्न केल्याप्रकरणी गुन्हा दाखल करण्यात आला आहे. अटक करण्यात आलेल्यांमध्ये प्रशांत राजू सोनवणे, शिवराज धनराज आहेर, आणि ऋषिकेश योगेश गांगुर्डे यांचा समावेश आहे.
पीडित पत्रकारांच्या म्हणण्यानुसार, त्र्यंबकेश्वर येथे येणाऱ्या पर्यटकांकडून प्रवेश शुल्क वसूल करणाऱ्या या गुंडांनी त्यांना अडवले. पत्रकार असल्याचे सांगितल्यानंतरही त्यांनी ऐकले नाही नंतर शाब्दिक वाद पेटला आणि याचे रूपांतर मारहाणीत झाले. या हल्ल्यात एका वृत्तवाहिनीचे पत्रकार किरण ताजणे यांना गंभीर मारहाण झाली आहे. त्यांच्यावर सध्या रुग्णालयात उपचार सुरु आहेत.
दरम्यान, या घटनेची गंभीर दखल घेत, मंत्री छगन भुजबळ यांनी रुग्णालयात जाऊन जखमी पत्रकारांची भेट घेतली. तसेच उपमुख्यमंत्री एकनाथ शिंदे यांनीही या प्रकरणी कठोर कारवाई करण्याचे निर्देश पोलिसांना दिले आहेत. या प्रकरणाचा पुढील तपास सुरू आहे.
