अहिल्यानगर: अहिल्यानगर शहरातील कायनेटिक (Ahilyanagar News) चौक परिसरात एका 23 वर्षीय तरुणीसोबत घडलेल्या प्रकारामुळे संताप व्यक्त केला जात आहे. एका तरुणाने आधी तिचा रस्त्यात अडवून विनयभंग केल्याची आणि नंतर खोटे प्रेमसंबंध असल्याचे सांगत तिचे ठरलेले लग्न मोडल्याची घटना उघडकीस आली आहे. या प्रकरणी कोतवाली पोलिस ठाण्यात आरोपीविरुद्ध गुन्हा दाखल करण्यात आला आहे. (Latest Marathi News)
मिळालेल्या माहितीनुसार, पीडित तरुणी कायनेटिक चौक परिसरातील गजराज हॉटेलसमोरून घरी जात असताना हा प्रकार घडला. तुषार अर्जुन हरेल (रा. येलुलकर चाळ, रेल्वे स्टेशन परिसर, अहिल्यानगर) याने तिचा रस्त्यात अडवून हात धरत भररस्त्यात लज्जा उत्पन्न होईल असे कृत्य केल्याचा आरोप आहे. या वेळी त्याने “तू दुसऱ्या कोणाशी लग्न केलंस तर याद राख,” अशी धमकी देत तिच्यावर दबाव टाकण्याचाही प्रयत्न केल्याचे तक्रारीत नमूद करण्यात आले आहे.
तपासातून समोर आलेल्या माहितीनुसार, आरोपीने यापूर्वी त्या तरुणीकडे लग्नाची मागणी घातली होती. मात्र तरुणीच्या कुटुंबीयांनी हा प्रस्ताव स्पष्ट शब्दांत नाकारला होता. या नकाराचा राग मनात ठेवून आरोपीने तिचा पाठलाग करण्यास सुरुवात केली आणि संधी साधून रस्त्यात अडवत धमक्या दिल्या.
इतक्यावरच न थांबता आरोपीने तरुणीच्या होणाऱ्या सासरच्या मंडळींशी संपर्क साधला. “आमचे प्रेमसंबंध आहेत, तिच्याशी लग्न करू नका,” असे खोटे सांगत त्याने तिच्या चारित्र्यावर शंका निर्माण करण्याचा प्रयत्न केला. या चुकीच्या माहितीनंतर तरुणीचे ठरलेले लग्न मोडले. या घटनेमुळे तरुणी आणि तिच्या कुटुंबीयांना मोठा मानसिक धक्का बसला आहे.
दरम्यान, पीडित तरुणीच्या तक्रारीनंतर कोतवाली पोलिसांनी आरोपी तुषार हरेल याच्याविरुद्ध विनयभंग आणि धमकावल्याप्रकरणी गुन्हा दाखल केला आहे. या प्रकरणाचा पुढील तपास सुरू असून शहरात घडलेल्या या प्रकारामुळे महिलांच्या सुरक्षिततेबाबत पुन्हा एकदा गंभीर प्रश्न उपस्थित झाले आहेत.
